Navenda Nûçeyan – Ferîba Hosseînî, diransaz û çalakvana 37 salî ku li Îranê bajarê Şîrazê dijî, gazînameyek wergirt ku di nav 10 rojan de serî li Qereqola Polîsan a Qesrdeştê bide. Di gazînameyê de hatibû gotin ku eger di dema diyarkirî de neçe, ew ê were binçavkirin.

Dadweriya Îranê ji ber nivîsandina dirûşmeya "Ji Komara Îslamî re mirin" li Ferîba Huseyînî salek cezayê girtîgehê bi kelebçeya elektronîkî da. Li gorî biryarê, ew ê cezayê xwe di cîhekî teng de ku ji hezar metreyî zêdetir nebe, bikşîne.

Dadgehê her wiha du sal qedexe li ser tora dîjîtal, qedexeya seferê û betalkirina pasaporta wê ferz kir.

Ferîba Hosseînî, bi rêya tora dîjîtal bertek nîşanî biryarê da û got, "Min çi sûc kiriye? Min tu sûc nekiriye."

Ferîba Hosseînî berê di serdegirtina mala wê de hatibû girtin û piştî çend mehan bi kefaletê hatibû berdan. Her wiha hatiye ragihandin ku dozek nû li dijî wê bi tohmetên "civîn û komployê" û "propagandaya dijî-rejîmê" hatiye vekirin.

Rêxistinên mafên mirovan diyar dikin ku li Îranê, bi taybetî li dijî çalakvanên jin û rexnegirên hikûmetê, kelepçeyên elektronîk wekî amûrek tepeserkirinê têne bikar anîn.