Navenda Nûçeyan- Di du rojên dawî de nêzî 3 hezar malbatên ji Efrîn û gelek sivîlên ji Kantona Tebqayê neçar man ji ber êrîşên cîhadîstên Heyet Tehrîr el-Şam koçî Kantona Cîzîrê yên girêdayî Rêveberiya Xweser a Bakur û Rojhilatê Sûriyeyê bibin.

Komîteya Koçberên Serêkaniyê, têkildarî rewşa koçberên ji Heleb, Reqa û Tebqayê gihîştine kantona Cizîrê daxuyanî da.

Komîteyê, rave kir ku bi hezaran malbatên koçber gihîştine kantona Cizîrê û bi şert û mercên jiyanê yên pir dijwar re rûbirû ne, stargeh, xwarin, av û pêdiviyên tendirûstî her wiha pêdiviyên bingehîn ên zarok, jin û extiyaran kêm in.

Komîteyê, bang li koçberên Serêkaniyê li herêm û bajarên cuda yên kantona Cizîrê û hemû kes, sazî, xêrxwaz û rêxistinên mirovî û mafên mirovan ên herêmî û navneteweyî kir ku berpirsyariyên xwe yên exlaqî û mirovî pêk bînin û tavilê tedbîrên pêwist bigrin da ku alîkariya tendirustî û mirovî peyda bikin.

Komîteyê, di dawiya daxuyaniya xwe de got ku piştgiriya koçberan û sivikkirina êşên wan erkeke mirovî ya lezgîn e, nayê paşxistin û bang kir ku tedbîrên lezgîn û bi bandor werin girtin.