Hêvîn Silêman: Peymana li Helebê hat îmzekirin dê rê li ber pêşketinên nû veke
Hevseroka Meclîsa taxên Şêx Meqsûd û Eşrefiyê Hêvîn Silêman destnîşan kir ku yekem car e li Helebê bi destê jinan peymanek tê îmzekirin û da zanîn ku ev dê rê li ber pêşketinên nû yên baş veke.

Heleb – Li bajarê Helebê der barê rewşa taxên Şêxmeqsûd û Eşrefiyê ku piraniya şêniyên wê Kurdin de, di navbera Meclisa Sivîl ya herdu taxan û şandeyeke desthilata Şamê de peymanek ji 14 xalan pêk tê, hat îmzekirin. Hevseroka Meclîsa Taxên Şêxmeqsûd û Eşrefiyê Hêvîn Silêman têkildarî peymana ku li ser statuya Şêxmeqsûd û Eşrefiyê hatiye îmzekirin ji ajansa me re axivî.
Hêvîn Silêman diyar kir ku di demeke wisa, pêvajoyek dîrokî de îmzekirina peymanê ji bo wan pir girîng e. Hêvîn da zanîn ku bi taybetî jî îmzekirina bi destê jinan, ji bo wan cîhê serbilindiyê ye û wiha got: “Di Destûra Sûriyeyê de me dît ku rengê jinê tuneye. Di kongreya Sûriyeyê ya netewî de ti rengê jinê tunebû.”
‘Cara yekê li Helebê, bi destên jinê tê îmzekirin’
Hêvîn destnîşan kir ku jinên ku ji bo desthilatiya Şamê hatine bicîhkirin jî ti rengên wan tuneye û wiha pê de çû: “Îro jinan bi sîstema hevserokatiyê, îmzeya sîstema Sûriyeyek ne navendî, Sûriyeyek demokratîk cara yekê li Helebê, bi destên jinê îmze kirin. Ev hemû bi ked û berxwedaniya bi sedan jinên şehîd ku pêşangtiya vê şoreşê kirin û ev şoreş bû şoreşa jinê, pêk hat. Li ser rûyê erdê ji aliyê civakî, sîyasî, rêxistinî de îro jin biryara vê pêvajoyê didin û ew bi bi xwe xwe bi rêve dibin. Îmzeya xwe jî li dîrokê dixin. Ev jî Sûriyeyê ber bi Sûriyeyek demokratîk ve dibe, ne Sûriyeyek navendî. Ev dê ji bo demên pêş jî bibe bingehek.”
‘Ev gav dê pêşî li gavên mezintir veke’
Hêvîn anî ziman ku hemû jinên Sûriyeyê pêwîst e destên xwe bidin hev, bibin yek û wiha got: “Divê fikrên xwe bikin yek, ji bo Sûriyeyek bi ewle, bi aramî, rê li ber komkujiyên jinan digre, vîna jinan derdixe pêş û mafên xwe di Destûra Sûriyeyê de misoger dike. Ev yek jî îmzeya ku ji alîyê Şêxmehsûq ve hatiye îmzekirin a ku li ser desthilatiya Şamê destpê kir, bû bingeh ji demên pêş re. Em bi hêvî ne ku vegera li Efrînê jî wê nêzîk bibe. Ev gav ji xwe wê pêşiya gavên mezintir jî veke. Wê vegera li hemû cîhên ku ji aliyê dewleta Tirk ve hatine dagirkirin jî, pêk bîne. Jin careke din wê pêşengtiya wê bike. Jin wê di pêşerojê de pêşeng be. Di rizgarkirin, avakirinê de hebûna jinê dê misoger bibe.”