AVRÎN NAVDAR

Hesekê – Li bajarê Qamişlo yê Bakur Rojhilatê Sûriyeyê di roja 23’ê Adarê de bi dirûşma “Bi pêşengiya jinên Kurd yekitiya neteweyî ya Kurd misoger dibe” 1’emîn Konferansa Jinên Kurd li Rojava hat lidarxistin. Endama Koordînasyona Kongra Star Elîf Hemo têkildarî konferansê ji ajansa me re nirxandin kir. Elîf Hemo di destpêka axaftina xwe de bal kişand ser hedefên konferansê û bandora mezin a li ser yekitiya neteweyî, anî ziman ku ji bo aliyên Kurd bibin yek hewldan û fedakariyên mezin kirine û wiha got: “Gelê Kurd salên dirêj e ji bo bihêzkirina aliyê Kurd û di nava gel de pêşxistina ruhê yekitiyê têdikoşe. Îro gelê herêmê û partiyên Kurdan çalakiyên ku hevpar dane meşandin, yek ji serkeftinên gelê Kurd bi dest xistiye.”   

‘Jin dikarin berpirsyariyê bigrin’

 Elîf Hemo destnîşan kir ku jinên Kurd di xwedîderketina li doza xwe de xwedî berpirsyarî ne û wiha got: “Weke tevgera azadiya jinan di vê pêvajoya hesas de divê bi rola xwe ya pêşeng rabin. Li hemberî binpêkirin, windakirina nasnameyan, şikandina îradeya jinan û civakê divê em berpirsyariya xwe ya der barê yekitiya neteweyî ya Kurdan de bi cih bînin. Bi pêşketina pêvajoya Şoreşa Rojava, li Bakur û Rojhilatê Sûriyeyê, jin di qadên leşkerî, siyasî, aborî, civakî û gelek qadên din de bûn xwedî destkeftiyên girîng û tecrubeyan.” Elîf Hamo da zanîn ku jin di warê temînata mafên gelê Kurd de dikarin berpirsyariyek mezin bigrin.    

‘Banga Rêber Apo yekitiyê bi hêz kir’

Elîf Hemo diyar kir ku bi banga Rêberê Gelê Kurd Abdullah Ocalan a ‘Aştî û Civaka Demokratîk’ jinan pîrzobahiyên 8’ê Adarê û Newrozê bi coşeke mezin pêşwazî kirine û wiha got: “Coşa di 8’ê Adarê û Newrozê de di konferansê de jî xwe da der. Peyama Rêber Apo ya 8’ê Adarê, yekitî û bihevrebûna di navbera jinan de bi hêztir kir. Beşdarên 1’emîn Konferansa Jinên Kurd li Rojava piştrast kirin ku banga Rêber Ocalan li hemberî pirsgirêkên ku tên jiyîn çareseriya herî guncaw e. Di qonaxa ku Kurdistan û Rojava tê re derbas dibe de berpirsyariya ku dikeve ser milên jinan heye. Di çarçoveya konferansê de yek ji mijarên herî girîng, berpirsyariya ku di pêkanîna yekitiya neteweyî de dikeve ser milên jinan bû.”

‘Di destûra nû ya Sûriyeyê de peyva ‘demokratîk’ li gorî wateya xwe nehat bikaranîn’

Elîf Hemo da zanîn ku banga ‘Aştî û Civaka Demokratîk’ a Rêberê Gelê Kurd Abdullah Ocalan di pêşketina demokrasî û wekheviya di civakê de ji bo jinan ronesanseke nû ye û wiha domand:

“Jinan vê banga dîrokî, heman demê di warê bepirsyariyek de girtin dest. Di konferansa jinên Kurd de hedefên der barê pêşeroja Sûriyeyê de hatin diyarkirin. Bi temamî jinên ku beşdarî konferansê bûne diyar kirin ku destûra bingehîn a nû ya Sûriyeyê nûnertiya wan nake, ji ber nûnertiya pergaleke navendî û mezhebî dike, pêkhateyên Sûriyeyê û mafên jinan naxe bin temînatê. Beşdaran diyar kirin ku di destpêkê de mafên jinan û parastina wan daxwaza destûreke bingehîn ku mafên hemû koman û pêkhateyan digre nava xwe kirin. Ger destûra bingehîn neyê guhertin, wê tiştên berê bûne careke din dubare bibin û şerê li Sûriyeyê kûr bibe. Di destûra bingehîn a nû ya Sûriyeyê de peyva ‘demokrasî’ li gorî wateya xwe ya rast nehat bikaranîn. Ji ber destûra bingehîn hebûna jinan, nasname û gelek hêman û hebûna mezheban nas nekiriye.”

‘Divê jin têkoşîna xwe mezin bikin’

Elîf Hemo di dawiya axaftina xwe de destnîşan kir ku divê jin li dijî rejîma zilm û otorîter têkoşîna xwe mezin bikin û got: “Li Sûriyeyê hemû pêkhate û mezheb ji bo mafên wan bikeve bin temînatê divê destûra bingehîn nû were nivîsandin. Divê kesên neçar mane ji Efrîn, Serêkaniyê, Girê Spî koçber bibin careke din vegerin ser xaka xwe. Li hemû herêmên Sûriyeyê, ewlehî û aramî ji nû ve were pêkanîn. Li hemû herêmên Sûriyeyê pêkanîna ewlehî û aramiyê encax bi yekitiya neteweyî ya Kurdan dikare bi ser bikeve.”