Navenda Nûçeyan – Di 2’ê Adarê de, di dema şerê berdewam ê di navbera Îran û Îsraîl-Dewletên Yekbûyî de, Hizbullah ji bo tolhildana kuştina Rêberê Olê Îranê Elî Xamineyî dest bi êrîşên mûşekî li ser Îsraîlê kir û di bersivê de, Îsraîlê dest bi êrîşên li ser deverên cuda yên Lubnanê kir.

Ziyanên ku di encama êrîşan de çêbûne

Li gorî agahiyên ku Wezareta Tenduristiyê ya Lubnanê duh êvarê piştrast kir, hejmara miriyan ji ber zêdebûna aloziyên Îsraîlê li Lubnanê gihîştiye 72 kesan û 437 kes jî birîndar bûne. Di heman demê de ji ber fermanên valakirinê yên Îsraîlê hejmara koçberan ji 83 hezarî derbas bûye. Di çend rojên dawî de 403 êrîş hatine tomarkirin û gelek kes li deverên cuda yên ku rastî bombebaranên dijwar tên hene.

Zêdeyî 83 hezar kes koçber bûne

Wezîra Karûbarên Civakî Hanîn El-Seyid eşkere kir ku hejmara kesên li stargehan qeydkirî ne gihîştiye 83 hezar û 847 kesan û diyar kir ku hejmara van navendan 399 e û li herêmên cuda belav bûne.

Hişyariyên valakirinê

Di heman demê de, hêzên Îsraîlê duh hişyarî kirin ku qadên valakirinê berfireh kirine hemû niştecihên başûrê Lubnanê jî di nav xwe de digrin û daxwaz kirin ku ew herêmê biterikînin û ber bi bakurê Çemê Lîtanî ve biçin. Her wiha Yekîneya Rêvebiriya Rîska Karesatan a Beyrûdê ji destpêka aloziyê ve 403 kiryarên dijminane li dijî Lubnanê tomar kir.

Sibeha roja Duşemê, Hizbullahê bi mûşek û balafirên bêmirov baregeheke leşkerî li bakurê Îsraîlê hedef girt. Êrîş weke bersivek li ser êrîşên berdewam ên Îsraîlê li ser Lubnanê û kuştina Rêberê Bilind ê Îranê Elî Xamineyî di çarçoveya êrîşa Amerîka-Îsraîlê ya li dijî Îranê de ku ji sibeha şemiya borî ve berdewam dike.

Êrîşên niha di çarçoveya zêdebûna şer de tên kirin ku ji salekê zêdetir e berdewam dike. Ji dema ku Îsraîl di şerê xwe yê li ser Lubnanê di Cotmeha 2023’an de dest pê kir, berî ku di Îlona 2024’an de veguhere şerekî berfireh, zêdetirî 4 hezar kes kuştin û nêzî 17 hezar kes birîndar kirin.