Hesekê – Yekîneyên Parastina Jinê (YPJ), di bin diruşmeya "Artêşbûna jinê misogeriya jiyana azad e" de bi mebesta damezrandina xwe ya 12'emîn û Rojbûna Rêberê Gelê Kurd Abdullah Ocalan, torenek leşkerî û şahî lidar xist.

Çalakî li hola Serdem a bajarê Hesekê ya kantona Cizîra Bakur û Rojhilatê Sûriyeyê bi beşdariya fermandar û şervanên YPJ'ê û saziyên jinan ên li bajêr hat lidarxistin. Qada şahiyê bi wêneyên Rêberê Gelê Kurd Abdullah Ocalan, pakrewanên jin û alên Yekîneyên Parastina Jin hatin xemilandin.

'YPJ bûye nasnameya hemû jinan'

Çalakî bi torena leşkerî ya YPJ'ê destpê kir û deqeyek rêzgirtin pêk hat. Paşê Fermendara YPJ'ê Newroz Ehmed axivî. Newroz Ehmed ev şahî li Rêberê Gelê Kurd Abdullah Ocalan û hemû şervanên YPJ'ê pîroz kir û wiha got: "Bi saya fikr û ramanên Rêber Apo a ku pêşkêşî jinan kiriye, em hêzên xwe ava dikin. Yekem car li cîhanê tevahî û bi taybet li Rojhilata Navîn YPJ dibe artêşbûn û hêza jinê. YPJ’ê bi hêz, berxwedan û têkoşîna xwe li hember terora DAIŞ’ê şer kir û ew têk bir. Îro berxwedana YPJ'ê li pira Qereqozaq û bendava Tişrînê jî carek din nîşanî dinyayê dide ku tu kêz bi îradeya jina azad nikare. Ew bi hemû hêz û îradeya xwe li dijî dagirkeran şer dike. YPJ bûye nasnameya hemû jinên têkoşer û berxwedêr. Em ê bi hêz û têkoşîna xwe Rêber Apo bi awayê fîzîkî azad bikin û xwedî li banga dîrokî ya Aştî û Civaka Demokratîk derkevin."

Şahî jî bi stranên koma Şehîd Hêva ya Tevgera Hîlala Zêrîn a kantona Efrînê dest pêkir. Piştre Koma govendê ya Şehîd Arjîn û Şehîd Zîlan ên şervanên YPJ'ê jî, bi govendên xwe şahî pîroz kirin.

Ji gelek welatan pîrozbahî ji bo salvegera 12'emîn a damezrandina Yekîneyên Parastina Jin (YPJ) hatin şandin û ev hêz li hemû jinan pîroz kirin.

Hunermend Yesmîn Esker bi stranên xwe salvegera damezrandian YPJ û Rojbûna Rêberê Gelê Kurd Abdullah Ocalan pîroz kir.

 Şahî bi gerandina govendên gelêrî bidawî bû.