قوتابخانەیەک لەلایەن کەسی نادیارەوە دەرگا و کەرەستەکانی دەشکێنرێت
شەوی ٦ی حوزەیران، قوتابخانەی شاوازی بنەڕەتی لەلایەن چەند کەسێکی نادیارەوە هێرش دەکرێتە سەری و دەرگا و پەنجەرە، کەرەستە و ئامێرەکانی ناوی دەشکێنن.
گەرمیان
درەنگانێکی شەوی ٦ی حوزەیران قوتابخانەی شاوازی بنەڕەتی لە گوندی شاوازی سەر بە شارەدێی مەیدان لە شاری خانەقین لەلایەن چەند کەسێکی نادیار هێرشی دەکرێتە سەر و زۆرێک لە کەرەستەکانی، وەک کورسی و مێز، ئامێری میوزیک و موبەریدە، شوشەی دەرگا و پەنجەرەی شکێندراوە، کاغەز و پرتووکەکانی نێوی دڕێنراون و بە تەواوی قوتابخانە تێکدراوە.
موختار ساڵح بەڕێوبەری قوتابخانەی شاوازی بە ژنهای ڕاگەیاند: سەرلەبەیانی ٦ی حوزەیران نەڕۆشتمە قوتابخانە، کلیلی قوتابخانەم دایە مامۆستاکان و خۆم وەکو لیژنەی وەرگرتنی مووچە ڕۆشتم بۆ مووچە، مامۆستاکان پەیوەندییان پێوە کردم کە دەرگای قوتابخانەکە شکێندراوە و کەرەستە و ئامێرەکان تێکدراون، منیش بەڕێوبەری گشتی پەرەوەردەم لێ ئاگادار کردەوە و بڕیارە سبەی بێن و لێکۆڵینەوە لەسەر ڕووداوەکە بکەن.
بەڕێوبەری قوتابخانەکە وتیشی ئەمڕۆ ئاسایش هاتووەتە قوتابخانە و لێکۆڵینەوەی کردووە، بڕیارە لەگەڵ قوتابییەکاندا لێپرسینەوە بکرێت دەربارەی ڕووداوەکە.
موختار ساڵح ئاماژەی بەوەشدا کە قوتابخانەکەیان تا ئێستا پاسەوان و کارگوزاری نییە.
ت.پ