ناوەندی هەواڵ

 

کۆمەڵگەی ژنانی ئازادی ڕۆژهەڵاتی کوردستان "کژار" سەبارەت بە دۆخی تەندروستی زەینەب جەلالیان، ژنە چالاکوانی سیاسی کورد ڕاگەیاندراوێکی بڵاو کردەوەو تێیدا هاتووە: دۆخی تەندروستی زەینەب جەلالیان، کۆنترین ژنی زیندانیی سیاسی لە ئێران زۆر خراپە و گیانی ئەم چالاکوانە کوردە لەناو زیندانی یەزدا لە مەترسییەکی جددی دایە و پێویستی بە چارەسەری بەپەلە هەیە.

 

ئاماژە بەوەشکراوە، دەزگا ئەمنییەکان پێشکەشکردنی هەر جۆرە چاودێرییەکی پزیشکی و تەنانەت مافی پەیوەندیی تەلەفۆنی ئەم زیندانییە سیاسییەیان بە نووسینی نامەی پەشیمانی مەرجدار کردووە، ئەمەش لە کاتێکدایە زەینەب بەهۆی لێکەوتەکانی ئەشکەنجەوە لە مەترسیی لەدەستدانی تەواوی بیناییدایە و پێشتریش لە زیندانی قەرچەک تووشی کۆرۆنا بوو.

 

کۆمەڵگەی ژنانی ئازادیی ڕۆژهەڵاتی کوردستان (کژار) جەختی لەوە کردەوە، زەینەب جەلالیان بووەتە هێمای خۆڕاگریی ژنان دژ بە چەوسانەوە و داوای دەستبەجێی ئازادکردنی بێمەرج و گواستنەوەی خێرای بۆ ناوەندە پزیشکییەکان دەکەین.

 

زەینەب جەلالیان کە تەمەنی ٤٥ ساڵە، لە ساڵی ٢٠٠٧ـەوە دەستبەسەر کراوە و نزیکەی دوو دەیە بەبێ وەرگرتنی تەنانەت یەک ڕۆژ مۆڵەت، لە زیندانەکانی خۆی، قەرچەک، کرمان، کرماشان و یەزدا ڕاگیراوە، ئەو لە ساڵی ٢٠٠٩ بە تۆمەتی “محاربه و پەیوەندی لەگەڵ پارتی ژیانی ئازادیی کوردستان (پژاک)” سزای سێدارەی بەسەردا سەپێندرا، دواتر بەهۆی فشاری چالاکوانان و ڕێکخراو و دامەزراوەکانی مافی مرۆڤ سزاکە لە ساڵی ٢٠١١ـدا بۆ سزای زیندانی هەتاهەتایی گۆڕدرا.