ناوەندی هەواڵ

 

هێرشەکانی دەوڵەتی تورک بۆ سەر ناوچەکانی باکوور و ڕۆژهەڵاتی سووریا بەردەوامە، ەو هێرشانەدا دەوڵەتی تورک تەنها لە دوو ڕۆژی ڕابردوودا دەیان کۆمەڵکوژی ئەنجامداوە و ١٨ کەسی مەدەنی گیانیان لەدەستداوە، ئەو کۆمەڵکوژییەی دوێنێ لە شاری سیرین ڕوویدا، ١٢ هاوڵاتی گیانیان لەدەستدا، کۆنگرەی ستاری ڕۆژئاوا ڕاگەیەندراوێکی بڵاوکردەوە و کۆمەڵکوژییەکانی دەوڵەتی تورکی لە سیرین، زرگان و عەین عیسا شەرمەزار کرد.

 

کۆنگرەی ستار جەختی لەوە کردەوە کە ئەم تاوانە قێزەونانە ڕووداوی تاکەکەسی و هەڕەمەکی نین، بەڵکو بەشێکن لە زنجیرەیەک پێشێلکاری سیستماتیکی بەردەوامی دەوڵەتی تورکیا دژی گەلی سووریا، ئەم کردەوانە پێشێلکردنی هەموو پێوەر و ڕێککەوتنە نێودەوڵەتییەکانە، بەتایبەتی یاسای مرۆیی نێودەوڵەتی.

 

"بێدەنگی بەشداریکردنە لەم کارانەدا"

کۆنگرەی ستار سەرنجی بۆ بێدەنگیی نێودەوڵەتی لە بەرامبەر ئەو کۆمەڵکوژیانە ڕاکێشا و وتی: لەم چوارچێوەیەدا نەتەوە یەکگرتووەکان و ئەنجومەنی ئاسایش و هەموو ڕێکخراوەکانی مافی مرۆڤ بیردەخەینەوە کە بێدەنگییان بەرامبەر بەو تاوانانە وەک بەشداریکردن لە ئەنجامدانی ئەو تاوانانە سەیر دەکرێت و ئێش و ئازاری مرۆڤە بێتاوانەکان زیاد دەکات و هاوکارییەکە کە لەڕووی ڕەوشتی و یاساییەوە قبوڵ ناکرێت.

 

کۆنگرەی ستار داوای لە کۆمەڵگەی نێودەوڵەتی کرد بەخێرایی هەنگاو بنێن، لێکۆڵینەوەیەکی سەربەخۆی نێودەوڵەتی ئەنجام بدەن، سزا بەسەر تورکیادا بسەپێنن، هاوڵاتی مەدەنی بپارێزن.