سلێمانی، بە دروشمی "فێمیساید ڕابگرن" کۆبوونەوەی ڕاوێژکاری ژنان دەستیپێکرد
کۆبوونەوەی ڕاویژکاری سەبارەت بە دۆخی ژنان لە چوار پارچەی کوردستان دەستیپێکرد و گفتوگۆ لەبارەی توندوتیژی و کۆمەڵکوژی ژنان لە چوار پارچەی کوردستان دەکرێت.
سلێمانی
ئەمڕۆ لە هۆڵی تەوار لە شاری سلێمانی بە پێشەنگایەتی یەکێتی ژنانی کوردستان و کۆمسیۆنی ژنانی کۆنگرەی نەتەوەیی کوردستان، بە دروشمی "فێمیساید ڕاگرن" ژنانی چوار پارچەی کوردستان کۆبوونەتەوە و ڕاوێژ و تاوتوێی ڕەوشی ژنان لە کوردستاندا دەکەن.
کۆبوونەوەکە لە کاتژمێر ١٠ی پێش نیوەڕۆ بە خولەکێک وەستان بۆ گیانی پاکی ژنانی کوژراو و تیرۆرکراو دەستیپێکرد و ژنان پێکەوە دروشمی "فێمیساید ڕابگرن"یان وتەوە، دواتر وتارێکی ڕێکخراوی یەکێتی ژنانی کوردستان لەلایەن کافیە سلێمان، سکرتێری ڕێکخراوەکە پێشکەشکرا و ئاماژەی بەوەدا، دیاردەی ژن کوشتن هۆکارەکەی دەگەڕێتەوە ئەقڵیەتی پیاوسالاری، "ئەگەر سەیری مێژووی کوردستان بکەین، کوردستان بۆ چوار پارچە دابەشکراوە و هەر پارچەیەک ژێردەستەی وڵاتێکی داگیرکارە و بە هاوڵاتی پلە دوو سەیر دەکرێت، بۆیە ژن لەو نێوەندەدا دوو جار دەچەوسێنرێتەوە، یەک لەژێر حوکمی داگیرکاری و جارێکی تر بە هۆکاری داگیرکاری و وەک نەتەوەی کورد".
کافیە سلێمان وتیشی: ئێمە وەک ژنانی چوار پارچەی کوردستان کۆبووینەتەوە تا پێکەوە ڕێگری بکەین لە کوشتنی ژنان".
دواتر زەینەب موراد، هاوسەرۆکی کۆنگرەی نەتەوەیی کوردستان، لەسەر ناوی کۆمسیۆنی ژنانی کەنەکە، وتارێکی پێشکەشکرد و ئاماژەی بەوەدا، پارچەکردنی ژنان کە لەلایەن حزبە سیاسیەکانەوە پێشەنگایەتی دەکرێت زیانی زۆری بە خەباتی هاوبەشی ژنان گەیاندووە، کوشتنی ژنان کە هۆکارەکەی ئەقڵیەتی پیاوسالاری و داگیرکارییە لە چوار پارچەی کوردستان هاوشێوەی یەکە، " به‌هۆی به‌رزبوونی ده‌نگی ئازادیخوازی ژنانی كورد زه‌خت و زۆرداری زیاتر له به‌رامبه‌ر ژنانی كورد به‌كاردهێنرێت، ده‌سه‌ڵاتداران به زهنیه‌ت وئادۆلۆژیای پیاوسالاری هێرشی ژنان ده‌كه‌ن. به‌شێوه‌یه‌كی راسته‌وخۆ و ناراسته‌وخۆ سیاسه‌تی تایبه‌ت به‌رێوه‌ده‌به‌ن، ژنانی کورد نەک تەنیا لە ئەنجامی سیاسەتی هێزە داگیرکەرەکانی كوردستان بەڵکو لە ناوخۆشدا، لە ئەنجامی سیستەمی دەسەڵاتداریی نەریتی خێزان وعەشیرەت و بەکارهێنانی ئایین به شێوه‌یه‌كی خراب، ڕووبەڕووی کۆمەڵکوژی ده‌بنه‌وه".
زەینەب موراد وتیشی: ئەمڕۆ کات کاتی ئازادی ژنە و ئەمڕۆ ڕۆژێکە پێویستە هەموو ژنان پێکەوە تێکۆشان بکەین و کۆمەڵکوژی و تیرۆری ژنان ڕابگرن، ژنان بوونە پێشەنگ و پارێزگارییان لە خاک و نیشتمان کردووە، ئێمەش دەتوانین پێکەوە کۆمەڵکوژی ژنان ڕابگرین، هەروەها ئاماژەی بەوەشدا ژنی کورد لە مێژووی گەلەکەماندا ڕۆڵێکی گەورەی هەبووە، بەرخۆدانی ژنی کورد لەپێناو ئازادیدا، سەرنجی ژنانی تەواوی دنیا ڕاکێشا، ژنی کورد بووە پێشەنگ و هیوای مرۆقایەتی، پێویسته هێزه سیاسیه كوردیه‌كان ئه‌م قۆناغه‌ی كه ژنان پێ گه‌یشتوون ببینن و سه‌ر له نوێ به خۆیاندا بچنه‌وه، چونكه ئێمەی ژنان ده‌ڵێین ئێدی له كوردستان كات كاتی ژنی ئازاده ژنی پێشه‌نگه، ئێمه‌ی ژنان به یه‌کگرتنی خۆمانه‌وه به هێز وتوانای خۆمانه‌وه ده‌توانین هه‌موو ئاسته‌نگییه‌كان بپه‌ڕینین، فمنیساید واتا قرکردنی ژنان ڕەبگرین و بەدڵسۆزی و هاوکاری یه‌كترو بەشێوەیەکی ڕێکستنکراو هه‌موو كێشه‌كانمەن چاره‌سه‌ر بكه‌ین.
کۆبوونەوەکە بەردەوامە و لە بەشی داهاتوودا دوو پانێڵ کە لە پێنج بابەت سەبارەت بە توندوتیژی و گرتنی ژنان بەهۆی دەسەڵاتی سیاسییەوە، ڕۆڵی یاسا و کەلتوور لە ناسنامەی ژناندا و ڕەوشی ژنان لە ژێر فشارە سیاسییەکاندا، دۆخی ژنان لەژێر دەسەڵاتی داگیرکارییدا و دۆخی ژنانی ئێزدیی لەواقعی ئێستادا، پێکدێت، پێشکەش دەکرێت.
ت.پ