ناوەندی هەواڵ

زیاتر لە ١٢٠ ڕۆژە خەڵک لە شارە جیاجیاکانی ئێران دەستیان بە ناڕەزایەتی جەماوەری کردووە دژی ڕژێمی ئیسلامی ئێران و تا ئێستاش ئەو ناڕەزایەتیانە بەردەوامن، خەڵکی بەشێک لە گەڕەکەکانی تاران وەک ئەکبەتان، باغری و شەبانە، لە ماڵەکانیانەوە دروشمی دژە حکومەت هاوار دەکەن، هاوکات لە حەفت هۆزی تاران، گەنجانی خۆپیشاندەر سەرەڕای توندی دۆخی ئەمنی بۆ ڕێزگرتن لە یادی موحسین شیکاری، کە لەلایەن ڕژێمەوە لەسێدارە درا، گردبوونەوە.

 

نووسینی دروشم لە زۆربەی شارەکانی ئێران، لەوانە تاران، گەیلان و هتد بەردەوامە، بە پێی وێنە بڵاوکراوەکان، ژنانی ناڕازی لەناو پاسەکان لە تاران، بە نووسینی دروشمی "مەرگ بۆ ئاساییبوونەوە"، هاوار بۆ بەردەوامیی خەبات دەکەن.

 

لە شارەکانی تر، وەک جوانرۆ، بۆکان، سنە، تاران و هتد، خەڵک لە سەر مەزاری شەهیدانی شۆڕشی "ژن، ژیان، ئازادی"، لەوانە بورهان ئەلیاسی، شەهریار محەممەدی، حەمیدرەزا ڕوحی، یەڵدا ئاغافازلی، سیاواش مەحمودی و هتد. خۆیان نیشان دا و بە دانانی گوڵ ڕێزیان گرت.

 

فەرناز حوسێن زادە، دیزاینەری جلوبەرگ و دانیشتووی شاری تاران، لە ٢٦ی تشرینی یەکەم لەلایەن لقی ٢٦ی دادگای ئینقلابی تارانەوە بە تۆمەتی "تێکدانی نەزمی گشتی و کۆمەڵگە و پیلانگێڕی دژی ئەمنیەتی شاری تاران" بە ٤ ساڵ و ٨ مانگ زیندان و ٧٦ قامچی سزای بەسەردا سەپێندرا ئێران، بە پێی هەواڵە بڵاوکراوەکان، ڕۆژی ٢٤ی کانوونی یەکەمی ٢٠٢٢ کۆبوونەوەیەک بۆ مامەڵەکردن لەگەڵ تۆمەتەکانی فەڕناز حوسێن زادە بەڕێوەچوو و ڕۆژێک دوای بەڕێوەچوونی کۆبوونەوەکە، ناوبراو بە دانانی بارمتەی ٨٠٠ میلیۆن تمەن ئازاد کرا.

 

ڕۆژی ١٦ی کانوونی دووەم، سامانە بابازادە، هونەرمەند و ئەکتەر لە دادگای تێهەڵچوونەوەی تەبرێز بە ١٠ ملیۆن تمەن و قەدەغەکردنی یەک ساڵ لە چوونەدەرەوە لە ئێران و دەستبەسەرداگرتنی مۆبایلەکەی سزای بەسەردا سەپاند، ئەمەش دوای ئەوەی بانگهێشتی داواکاری گشتیی تەبرێز کرا و لە زیندانی شارەکە دەستبەسەر کرا.

 

دوێنێ، ١٧ی کانوونی دووەمیش، مۆژگان ئیلانلو، فیلمساز و فۆتۆگرافەر و چالاکی کۆمەڵایەتی، کە لە ١٨ی تشرینی یەکەمی ٢٠٢٢دا لە کاتی ناڕەزایەتییە سەرتاسەرییەکان لەلایەن هێزە ئەمنییەکانەوە دەستبەسەر و بۆ زیندانی ئەڤین گوازرایەوە، لەلایەن لقی ٢٦ی دادگای ئینقلابەوە بە تۆمەتی "کۆکردنەوە و هاوکاری دژی ئاسایشی وڵات" ٤ ساڵ زیندانی و بە تۆمەتی "چالاکی تەبلیغی دژی نیزام" بۆ ١٥ مانگ، بە تۆمەتی "هاندانی کردەوەی پێچەوانە" بە ١٥ مانگ و ٧٤ قامچی، پێدانی ٨ ملیۆن تمەن سزادرا، هەروەها قەدەغەکردنی ئەندامبوون لە پارتە سیاسی و کۆمەڵایەتیەکان، گروپ و گروپەکان، قەدەغەکردنی دەرچوون لە وڵات قەدەغەکردنی دامەزراندن لە بابەتەکانی پەیوەست بەو تاوانەی ئەنجامدراوە، وەک چالاکییەکانی ڕاگەیاندن و پڕوپاگەندەیی، سزای ٢ ساڵی بەسەردا سەپێندرا، لەگەڵ ئەوەشدا دەست بەسەر کۆمپیوتەری تایبەتی و مۆبایلەکەیدا گیرا بۆ بەرژەوەندی حکومەت.