حەلەب

 

بومەلەرزەکانی ٦ی شوبات شاری حەلەبیشی گرتەوە، لە گەڕەکەکانی شێخ مەقسود و ئەشرەفییە ٦ کەس گیانیان لەدەستدا و ٤٣ کەسیش بریندار بوون، ئەو خەڵکەی لە عەفرینەوە ڕوویان لە حەلەب کردبوو، ٢ هەزار و ٥٠٠ خێزانیان جارێکی دیکە ڕوویان لە کامپەکانی شەهبا و گوند و ناحیەکانی شێراوە کرد تا ژیانیان پارێزراو بێت، جگە لەوەش حکومەتی دیمەشق ڕێگری لەو هاوکاریانە کرد کە ئیدارەی خۆسەری باکوور و ڕۆژهەڵاتی سوریا بۆ حەلەبی ناردبوو و ڕێگەی نەدا پێداویستییە پێویست و هەنووکەییەکان بۆ لێقەوماوانی بوومەلەرزە بچنە ناوچەکە.

 

کارمەندانی شارەوانی لە کامپی بەرخۆدان ئاماژەیان بەوەدا، خەڵکی حەلەب کە چوونەتە کامپەکە، سەرقاڵی ئامادەکردنی چادر و شوێنی مانەوەیانن، ئەمین عەبدۆ یاسین، ژنێکی ئاوارەیە و بەهۆی بوومەلەرزەکەی حەلەب زیانی پێگەیشتووە، وتی: لە کاتی بوومەلەرزەکەدا چووینە دەرەوە، بینایەک لەبەردەمماندا داڕما و هەر بۆیە چووینە کامپەکانەوە.

 

"دوای گەیشتنمان بە کامپەکە، ئاسوودە بووین"

دایکێکی دیکە لە دانیشتوانی حەلەب وتی: کاتێک خەوتبووین، ئەو بینایەی تێیدا دەمانەوە زۆر بە توندی لەرزی، ئێمە ترساین و ڕامانکرد، کاتێک گەیشتینە کامپەکە، ترسەکەمان تێپەڕی و ئاسوودە بووین.

 

جودی منداڵێکی ئاوارەیە و باسی بوومەلەرزەکەی شاری حەلەب دەکات و وتی: کاتێک زەوی لەرزی ویستمان بچینە شوێنێکی ئارام، چونکە بوومەلەرزەکە بەردەوام بوو و ئەو بینایەی ئێمە تێیدا بووین تەندروست نەبوو. هەر بەو هۆیەشەوە چووینە کامپی بەرخۆدان لە شەهبا، زۆر دڵخۆشم بە گەیشتنمان بە شەهبا.