نەینەوا، بەهۆی ئاگرەوە ١١٣ کەس گیانیان لەدەستدا و سەدانیش بریندارن
شەوی ڕابردوو، لە ڕووداوێکی ئاگرکەوتنەوەدا لە ئاهەنگێکی هاوسەرگیریدا لە ناوچەی حەمدانیەی پارێزگای نەینەوا، ١١٣ کەس گیانیان لەدەستدا و سەدان کەسی دیکەش بریندارن.
ناوەندی هەواڵ
شەوی ڕابردوو، ٢٦ی ئەیلوول، لە هۆڵێكی ئاهەنگگێڕانی هاوسەرگیری لە شارۆچکەی حەمدانیەی سەر بە پارێزگای نەینەوا لە عێراق، بەهۆی بەكارهێنانی یارییە ئاگرینەكان، ئاگر لە هۆڵەکە کەوتەوە، بەهۆی تەشەنەسەندنی ئاگرەكە سەقفی هۆڵەکە بە تەواوی سووتا.
بەپێی لێدوانێکی بەڕێوەبەری تەندروستی نەینەوا بۆ ڕاگەیاندنەکان، ژمارەی گیان لە دەستدانی ڕووداوەکە بەرزبووەتەوە بۆ ١١٣ کەس و ژمارەی بریندارانیش نزیکەی ٣٠٠ کەسە.
بەڕێوەبەرایەتی بەرگری و شارستانی نەینەوا ڕایگەیاند، ئەو کەلوپەلانەی کە بۆ دروستکردنی هۆڵی ئاهەنگگێرانەکە بەکارهاتوون، کوالێتیان نزم بووە، بۆیە لە کاتی ئاگر کەوتنەوەکەدا سەقفی هۆڵەکە ڕووخاوە و ژمارەی قوربانییەکان بەرز بووەتەوە.