ناوەندی هەواڵ

 

ئاشکرابوونی دووبارەبوونەوەی دەستدرێژی سێکسی بۆ سەر منداڵان لە شرناخی باکووری کوردستان، شەپۆلێکی توڕەیی و ناڕەزایی لای خێزانەکان و ڕێکخراوەکانی داکۆکیکاری مافی منداڵانی لێکەوتەوە، کە جەختیان لەسەر پێویستی کردەوەی بەکۆمەڵ بۆ دابینکردنی ژینگەیەکی سەلامەت بۆ منداڵان و ڕێگریکردن لە پەردەپۆشکردنی ئەو تاوانانە بە هەموو شێوەیەک کردەوە.

 

لە ١١ی حوزەیران، یوسف ئاجار دوای دەستدرێژی سێکسی بۆ سەر چوار منداڵ لە شرناخ دەستگیرکرا، لێکۆڵینەوەکان دەریانخستووە کە پێشتر دەستدرێژی کردۆتە سەر ١٢ منداڵ، دوای ئەوەی منداڵەکان ئەزموونەکانیان لەگەڵ خێزانەکانیان باسکرد، ئاشکرایکرد کە ڕووداوەکە شەش مانگ پێشتر ڕوویداوە، بەڵام ترس وایکردووە زۆرێکیان نەتوانن قسە بکەن و هەواڵی دەستدرێژیەکان بدەن.

 

پلاتفۆرمی ژنان و منداڵانی شرناخ بە هاوکاری ٢٥ ڕێکخراوی مەدەنی لەو شارە، ڕاگەیاندراوێکیان سەبارەت بەو دۆسیەیە بڵاوکردەوە، داوای لە دانیشتوانی شارەکە کرد بەشداری ڕێپێوانێکی ناڕەزایەتی بۆ یاوانبارکردنی تاوانەکانی دەستدرێژی سێکسی بکەن، جەختیان لەسەر پێویستی کردەوەی بەکۆمەڵ کردەوە بۆ پاراستنی منداڵان و دەستەبەرکردنی دادپەروەری، بەتایبەتی کە دەستدرێژی سێکسی دژی منداڵان توڕەیی بەرچاوی گشتی لە شارەکەدا دروستکردووە.

 

لە ڕاگەیەندراوەکەدا هاتووە، لە چەند ڕۆژی ڕابردوودا شاری شرناخ شایەتی زیادبوونی مەترسیداری هێرشەکان بووە، شەپۆلێکی توڕەیی و ناڕەزایی قووڵی لێکەوتۆتەوە، بەئامانجکردنی منداڵان بەتایبەتی بەرپرسیارێتییەکی کۆمەڵایەتی بەسەر ئێمەدا دەسەپێنێت، جەخت لەسەر پێویستی ڕێکاری یاسایی بەپەلە دەکاتەوە، پێویستە هەموو منداڵێک هەست بە سەلامەتی بکات لەکاتی ڕۆیشتن لە شەقام، چوون بۆ خوێندنگە، یان یاریکردن لە گەڕەکەکەیاندا سەلامەتی دەروونی منداڵان تەنها تاوانێکی تاکەکەسی نییە، بەڵکو مەترسییەکی گەورەیە کە کاریگەری لەسەر ویژدانی کۆمەڵگە بە گشتی دەبێت.

 

پلاتفۆرمەکە دووپاتی کردەوە کە بەردەوام دەبن لە بەدواداچوون بۆ ئەم دۆسیەیە، بۆ دڵنیابوون لە لێکۆڵینەوەی ورد و دادگاییکردنی تاوانباران بە توندترین سزا، وتی: دەبێت بازنەی لێکۆڵینەوەکان فراوانتر بکرێت بۆ دەستنیشانکردنی هەموو ئەو کەسانەی کە پەیوەندییان پێوە هەیە، چ ناسراون یان نەناسراو، بە خێرایی ڕێکاری پێویست بەرامبەریان بگیرێتەبەر، ڕێگە نادەین هیچ منداڵێک لەم شارەدا لە بێدەنگی و ترسدا ئازار بچێژێت، پاراستنی منداڵان بەرپرسیارێتی خێزانەکان و دەوڵەت و کۆمەڵگە بە گشتییە، ڕێگە نادرێت دادپەروەری لە تاریکیدا بنێژرێت، ئەم تاوانە قێزەونانەش بە هیچ شێوەیەک پەردەپۆش ناکرێن.

 

لە نێوان واژۆکارانی ڕاگەیەندراوی پلاتفۆرمەکەدا دامەزراوەکانی کۆمەڵگەی مەدەنی و ڕێکخراوە پیشەییەکان هەن، کە هەڵوێستی هاوبەشیان لە دژی دەستدرێژیکردنە سەر منداڵان دەربڕی و داوای لێپرسینەوەیان لە تاوانباران کرد، هەروەها ناوەندی پارێزەرانی شرناخ، لقی کۆمەڵەی مافی مرۆڤ، ناوەندی توێژەرانی تەندروستی و کۆمەڵایەتی، کۆمەڵەی پارێزەرانی ئازادی و دامودەزگاکانی دیکەی شارەکە لەخۆدەگرن.

 

لە بەرامبەر دەستدرێژی سێکسیدا، ئەمڕۆ پلاتفۆرمی ژنان و منداڵانی شرناخ لە گۆڕەپانی کۆماری شرناخ کۆدەبنەوە، ڕێپێوانێکی ناڕەزایەتی ڕێکدەخەن، هەروەها لە گۆڕەپانی عومەر کابەک کۆنگرەیەکی ڕۆژنامەوانی لەسەر دۆسیەکە بەڕێوەدەچێت.