حەسەکە

 

کوشتنی ژنێک لە گەڕەکی "غویران" لە شاری حەسەکە لە ڕۆژی ١٢ی تەمووز، کاردانەوەی بەرفراوانی ژنان و ڕێکخراوەکانی ژنانی لێکەوتەوە، زۆرێک لەلایەنەکان داوای لێکۆڵینەوەی گشتگیر و لێپرسینەوە لە تاوانباران دەکەن.

 

کۆنگرەی ستار لە حەسەکە، لە ناوچەی باکوور و ڕۆژهەڵاتی سووریا لە ڕاگەیەندراوێکدا بە بەشداری ڕێکخراوەکانی ژنانی وەک ڕێکخراوی سارا بۆ بەرەنگاربوونەوەی توندوتیژی دژی ژنان، لەگەڵ چالاکوانان و چالاکوانانی مافی مرۆڤ، داوای لێپردینەوەی لە بکوژی ژنان کرد.

 

لە ڕاگەیاندراوەکەدا جەخت لەوە کراوەتەوە کە توندوتیژی دژی ژنان و ژنانی گەنج یەکێکە لە بەربڵاوترین و بەردەوامترین و تێکدەرترین پێشێلکارییەکانی مافی مرۆڤ، ئەم تاوانانە "مەترسیدارن و کاریگەریی کارەساتباریان لەسەر ژنان و کۆمەڵگە بە گشتی هەیە"، ئەوەشی خستۆتەڕوو، عەقڵیەتی پاوانخوازی و پیاوسالاری بەردەوامە لە ئەنجامدانی قێزەونترین تاوان دژی ژنان و پراکتیزەکردنی جۆرەها توندوتیژی، ئەمەش وایکردووە ئەو تاوانانە ببێتە هەڕەشەیەکی ڕاستەقینە بۆ سەر کۆمەڵگە بەگشتی و ژنان بەتایبەتی.

 

بەگوێرەی ڕاگەیەندراوەکە: ئەو ژنە گەنجە لەدایکبوی ساڵی ٢٠٠٦، لەلایەن هاوژینەکەیەوە کوژراوە، ئەم تاوانە بەشێکە لە زنجیرەیەک تاوان کە پەیوەندییان بە مرۆڤایەتییەوە نییە و لەلایەن ئایین و کۆمەڵگە و یاساوە قبوڵ ناکرێت.

 

لە ڕاگەیەندراوەکەدا داوا لە سەرجەم ئەندامەکانی مافی مرۆڤ و لایەنە پەیوەندیدارەکان و ڕێکخراوەکانی داکۆکیکار لە مافی ژنان کراوە کە لێکۆڵینەوەیەکی بەپەلە بکەنەوە، توندترین سزا بەسەر تاوانباراندا بسەپێنن و بە پەرۆشەوە کار بۆ کۆتاییهێنان بە تاوانە بەردەوامەکانی دژ بە ژنان بکەن.