ناوەندی هەواڵ

 

٢٧ی حوزەیران لە بەغدای پایتەختی عێراق کۆبوونەوەی سێ قۆڵی هەریەک لە وڵاتانی عێراق-ئەردەن- میسر بەڕێوەچوو، دەربارەی کاری هاوبەش و ستراتیژی لەپێناو بەرژەوەندی گەل و وڵاتانی بەشداربوودا.

 

مستەفا کازمی، سەرۆک وەزیرانی عێراق، لە تویتێکدا دەنووسێت: بەغدادی ئاشتی و عەرەبی پشوازی لە میوانەکان دەکات، لەو بارەیەوە بڵێسە جەبار فەرمان، ئەندامی پەرلەمانی عێراق، لە تۆڕی کۆمەڵایەتی خۆی لە فەیسبووک دەنووسێت: "کورد نابێت بەو دوو وشە کوردیە فریو بخوات کە کازمی دەیزانێت".

 

هەروەها دەشڵێت: وتاری سەرۆک وەزیرانی عێراق لە لوتکەی سیانی عێراق-ئوردن-میسر و ھەروەھا تویتەکەی مایەی نیگەرانی و تێڕامانە کە دەلێت "بغدادی عروبە پێشوازی لە میوانەکان دەکات"، ئەم دەربڕین و ھەنگاوەی کازمی یەکەم جار نیە. تا ئێستا چەندەھا ھەنگاوی ناوە بە کردنەوەی عێراق بە رووی وڵاتانی عربیدا و هەوڵی چاک کردنی پەیوەندیەکانی لەگەڵ سعودیە و کوەیت.

 ئەو پەرلەمانتارە ئاماژەی بەوەدا کە عێراق وڵاتێکە توانای پاراستنی سنورەکانی نییە، کێشمەکێشمی ناوخۆیی و قەیرانی دارایی و گەندەڵی تا قوڕقوڕاگەی ھاتووە، ئەم جۆرە ھەنگاوانە کێشەی زیاتری بۆ دروست دەکات.

 

"پێویستە سەرکردەکانی باشوری کوردستان کار بۆ بەستنی کۆنگرەی نەتەوەیی کورد بکەن"

لە کۆتایشدا دەڵێت: گەڕانەوەی عێراق بۆ سەردەمی بەعس و سەدامی خەتەرێکی گەورەیە لەسەر کورد و کوردبوون و ھەرێم، سەرکردەی حزبەکانی ھەرێم نابێت ئەم تویتە بە شێوەیەکی سادە وەرگرن، ھەروەک چۆن بەغدا هەوڵی کۆکردنەوەی عروبە لە دەوری خۆی دەدات، دەبێت بە زووترین کات سەرکردەکانی کورد کۆببنەوە و پلان و ستراتیجیەتی نوێ دابڕێژن، بە بۆچوونی من دەبێت ھەر لەدوای کۆبوونەوەیەکی سەرکردەکانی باشوری کوردستان کار بۆ بەستنی کۆنگرەی نەتەوەی کورد بکرێت.

 

دەشڵیت ئەم تویتە زەنگی گەڕانەوەی فاشیزم و فاشیەکانە، کورد نابێت بەو دوو وشە کوردیە  فریو بخوات کە کازمی دەیزانێت.

 

ت.پ