Navenda Nûçeyan – Parêzer Meryem Kiyan-Arsî ragihand ku girtina neqanûnî ya derhêner û lîstikvana jin Mîna Meşhedî Mehdî berdewam dike û rewşa tenduristiya wê li girtîgehê xirabtir dibe.

Meryem Kiyan-Arsî li ser hesabê xwe yê medyaya dîjîtal parvekirin kir ku muwekîla wê ji ber xwarina bê kalîte û şert û mercên xirab ên li Girtîgeha Varamînê ya Karçakê 8 kîlo daye.

Parêzer di daxuyaniyê de wiha got: "Di roja 35’emîn a girtina wê de (27ê Tebaxê), min li Girtîgeha Jinan a Karçakê nîv saet bi muwekîla xwe Mîna Meşhedî Mehdî re hevdîtin kir. Tevî ku pênc roj di ser biryara girtina mehekê re derbas bûne jî, der barê berdewamiya girtina wê yan guhertina biryarê de tu agahî nehatiye dayîn."

Meryem Kiyan-Arsî her wiha bal kişand ser rewşa girtiyên siyasî yên jin ên di girtîgehê de û got: "72 girtiyên siyasî yên jin di qadeke qirêj a 140 metre çargoşeyî de tên girtin. Ev tê vê wateyê ku ji bo her kesê kêmtir ji du metre çargoşeyî qada jiyanê heye."

Mîna Meşedî Mehdî di 1ê Tîrmeha 2025’an de ji aliyê hêzên ewlehiyê ve hat girtin, wekî ku hevjînê wê, Hasan Nakkaşî, li ser hesabê xwe yê medyaya dîjîtal ragihand. Hassan Nakkaşî parve kir ku hêzên ewlehiyê hevjînê wê birine û tevî ku jê re hatibû gotin ew ê "êvarê vegere", venegeriya malê.

Heta niha sedemek fermî ya girtina hunermend nehatiye eşkerekirin.

 Mîna Meşhedî Mehdî kî ye?

Mîna Meşedî Mehdî weke lîstikvan û derhênera belgefîlman tê nasîn. Wê di kurtefîlma "Sosyus" de rol girt û derhêneriya belgefîlmên wekî Badgirhâ-ye Yazd (Bircên Bayê yên Yezdê), Vahum, Kavir Bavar (Baweriya Çolê), Vayu No, Celaleddin, Anca Ke Bad Mivazad (Dema ku Ba Li Wir Difûre), Mahmule Manchester (Barê Manchesterê), Gesen, û Mazi kiriye. Wê gelek xelat ji festîvalên navneteweyî girtiye.