XWÎNDA DIYAR

Reqa – Rêberê Gelê Kurd Abdullah Ocalan ji bo gelê Kurd û gelên Rojhilata Navîn xwedî roleke girîng e, loma rojbûna wî mîna rojbûna gelê Kurd û jinan tê dîtin. Ocalan, bi felsefeya xwe ya neteweya demokratîk, bû rêberê gelan. Dayîka pakrewanan Meryem Henan, li ser 4’ê Nîsanê ku hem rojbûna Rêberê Gelê Kurd Abdullah Ocalan e û hem jî salvegera avabûna YPJ’ê ye, axivî.

Meryem Henan, 4’ê Nîsanê weke roja hebûna jinan, dilsoziya bi çand û axa xwe re pênase kir û wiha nirxand: “Rêber Apo ji bo me manîfestoya jiyanê ye, em bi saya vê manîfestoyê dijîn. Ger jin xwe nas nekin, nikarin civakê ji nû ve ava bikin. Rast e Reberê min tu niha di nava çar dîwarên Îmraliyê de yî, lê dilê me bi te re ye û çavên me li te ne, heya tu azad nebî em ê ji bo azadiya te têkoşînê bimeşînin.”

‘Bila jin bi vîna xwe rabin ser piyan’

Meryem Henan di berdewama nirxandinên xwe de bi hatina roja 4’ê Nîsanê re, hêviyên xwe wiha parve kir: “Hêviya me ew e ku em bi Rêberê xwe re 4’ê Nîsanê de li gundê Amarayê pîroz bikin. Ji bo ku azadiya Rêber Apo bê teqezkirin, pêwîst e hemû jin li welat û derveyî welat bi hêz û îradeya xwe rabin ser piyan û li keda Rêber Apo ya ji bo me hemû jinan daye, xwedî derkevin. Bi xwedîderketina li keda Rêber Apo em ê azadiya jinan pêk bînin.”

‘YPJ jinan û gelan diparêze’

Meryem Henan diyar kir ku di  heman demê de rojbûna rêberê gelan, roja damezrandina YPJ’ê ye û wiha domand: “Ji bo parastina mafên jinan û gelan YPJ hat damezrandin û roja 4’ê Nîsanê, weke roja jidayikbûna hemû jinan hat îlankirin. Bi vê re gav bi gav ji bo azadiya me jinan YPJ’ê di hemû pêngavên şer û jiyanê de gavên dîrokî avêt. Em jî hêza xwe di şervanên YPJ’ê de dibînin. Ji ber ku YPJ ji bo parastina jinan û axa welat di çeperên herî pêş ên Bendava Tişrînê, Pira Qereqozaxê de bû yek ji destanên lehengiyê.” 

‘Heta Rêber Apo azad ne em vê civakê wek civak nabînin’

Meryem Henan di berdewama axaftina xwe de bal kişand ser nirxandina Rêberê Gelê Kurd Abdullah Ocalan a ‘Civaka ku jin bi rê ve nebe, ne xwedî îfadeyê ye’ û axaftina xwe wiha domand: “Em jî weke jin vê dibêjin civaka ku tê de Rêber Apo bi fizîkî azad nebe, em wê civakê wek civak qebûl nakin. Heya azadiya fizîkî ya Rêber Apo em ê têbikoşin, hemû dayîkên aştiyê li derdora rêbertiyê bibin xeleka aştî û azadiyê.”

‘Rêber Apo ji ber ku riya azadiyê nîşan da hat girtin’

Meryem Henan bi mebesta rojbûna Rêberê Gelê Kurd Abdullah Ocalan jî ev bangewazî kir: “Em dayîk, bi hatina 4’ê Nîsanê bang dikin, hikmê Rêber Apo xilas bûye û pêwîst e serbest were berdan. Rêber Apo ji bo doza azadiya gelan hat girtin. Ji bo wê em jî bang li hemû cîhanê dikin ku Rêber Apo bi fizîkî êdî serbest were berdan. Ger em îro ji bo hemû neteweyan, hemû ziman, ol û baweriyan bang dikin ji bo azadiya Rêber Apo, ew jî bi saya felsefeya Rêbertiyê ye. Ji bo wê divê em bi ruhekî roja 4’ê Nîsanê pîroz bikin û Rêber Apo azad bikin. Ez dubare 4’ê Nîsanê rojbûna Rêber Apo li tevahî jinên cîhanê û li rêberê gelan pîroz dikim.”