Navenda Nûçeyan – Cîhadîstên Heyet Tehrîr el-Şam (HTŞ) Nexweşxaneya Şehîd Xalid Fecir a li taxa Şêx Meqsûd a Helebê bi bombebaraneke dijwar hedef girt. Êrîş gihîştina tenduristiyê ya welatiyên li herêmê bi awayekî cidî tehdît dikin. 

Nexweşxaneya Şehîd Xalid Fecr tekane navenda tenduristiyê ye ku xizmetê dide bi hezaran welatiyên ku li taxên Şêx Meqsûd, Eşrefiye û Benî Zad dijîn. Ji ber zêdebûna êrîşan di demên dawî de, gelek birîndar bi çavkaniyên pir kêm li vê nexweşxaneyê têne dermankirin. 

Nexweşxane duh çar caran li pey hev bi topên giran hate hedefgirtin û elektrîk hate qutkirin. Ev êrîşa giran ji bo welatiyan xetereyek mezin a karesateke mirovî diafirîne. 

Bangek ji bo rêxistinên navneteweyî û hiqûqî

Di daxuyaniyek nivîskî ya Hêzên Ewlekariya Navxweyî yên Helebê de, hat gotin ku nexşeyek nû ya ku hedefên gumanbar ên bombebaranê li Helebê nîşan dide ku tê dîtin ji hêla "Wezareta Parastinê" ya girêdayî hikûmeta Şamê ve hatiye weşandin, hatiye eşkerekirin. Di daxuyaniyê de hat destnîşankirin ku nexşeyê Nexweşxaneya sivîl a Xalid Fecr jî dihewîne ku ji duh ve bi berdewamî ji hêla topan ve tê hedefgirtin. 

Daxuyaniyê tekez kir ku danîna tesîseke tenduristiyê ya sivîl li ser nexşeyek hedef a ku bi eşkere hatiye ragihandin, delîlên teqez û belgekirî yên niyeta sûcdariyê ya pêşwext e, binpêkirinek eşkere ya qanûna mirovî ya navneteweyî ye ku parastina tesîsên bijîşkî di hemî şert û mercan de garantî dike, û di hemî aliyên wê de sûcê şer e. Hêzên Ewlekariya Navxweyî yên Helebê diyar kirin ku nexşeya weşandî ji bo rêveberiya demkî ya Sûriyeyê û piştgirên wê "şerm" e û hikûmet rasterast berpirsiyarê her zirara ku li sivîlan, navendên tenduristiyê û binesaziyê tê kirin e. Daxuyaniyê bi tekez kirina ku nexşe delîlên qanûnî ye ku pêşwext komkujî û binpêkirinên giran li dijî sivîlan nîşan dide, bi dawî bû û bang li rêxistinên navneteweyî û hiqûqî kir ku tedbîran bigirin.