Qamişlo – Ji bo avakirina civakek demokratîk û ewle, ku tê de dad û wekhevî serdest bin û rêz li mafên mirovan bên girtin, pêşxistina beşdariya çalak a jinan di hemû warên jiyanê de wekî stûnek bingehîn tê dîtin. Di vê çarçoveyê de, Meclîsa Jin a Tevgera Civaka Demokratîk (TEV-DEM), bi dirûşmeya “Jin stûna aştiyê, misogeriya mafê civakê û avakera şaristaniyê ye” komxebatek bi navê "Forma Jinên Sûrî û Avakirina Pêşerojê" li Kafeterya Lux a bajarê Qamişloyê li dar xist. Komxebat bi tevlêbûna berfireh a tevger û rêxistinên jinan pêk hat.

‘Jinên Rojava ji bo hemû jinên Sûriyeyê bûne nasname’

Piştî deqeyeke rêzgirtinê ji bo bîranîna cangoriyên azadiyê, Hevseroka TEV-DEM’ê Remziya Mihemed axaftina vekirinê kir û bal kişand ser tekoşîna jinan a di nava şoreşê de. Remziya Mihemed diyar kir ku armanca wan ew e ku bi rih û hebûnekî azad bi hemû pêkhateyan re li ser vê axê bê jiyankirin û wiha got: “Jinan ji destpêka şoreşê heta roja îro bi xebatên hevbeş parastina xwe û nirxên şoreşa jin kirin. Her wiha jinên Rojava ji bo tevahî jinên Sûriyeyê bûn nasname.”

Sê rûniştin û perspektîfên nû yên têkoşînê

Komxebat li ser sê rûniştinên sereke hat birêvebirin:

Rûniştina Yekem (Jin û Aştiya Civakî): Ji aliyê Rêvebriya Komeleya Mafên Mirovan Evîn Cuma ve hat birêvebirin. Di rûniştinê de hate destnîşankirin ku jinan di salên alozî û şer de gelek êş kişandine, lê belê her tim bûne ew hêza ku pêşî li hilweşîna civakî girtine û bûne pira nava aliyên dijber.

Rûniştina Duyem (Parastina Yasayî û Destûrî): Ji aliyê Parêzer Xanim Ayo ve hate birêvebirin. Hate destnîşankirin ku divê destkeftiyên jinan di qanûnan de werin misogerkirin û guhertina zihniyetê di nava civakê de bingehîn e. Her wiha hate gotin ku jinên Sûrî xwedî hêzek mezin in û ji bo birêvebirina Sûriyeyeke nû bi îrade ne.

Rûniştina Sêyemîn (Hêza Nerm û Rola Jinê): Ji aliyê Rêvebriya Meclîsa Jin a TEV-DEM’ê Efaf Hesen ve hate birêvebirin. Di vê rûniştinê de bal hate kişandin ser rola jinan di çand, huner û wêjeyê de û hate destnîşankirin ku jin bi pênûsa xwe li hemberî çekê derketine û têkoşîna xwe berdewam dikin.

Biryar û daxuyaniya dawî

Di dawiya forumê de daxuyaniyek hate dayîn û daxwazên sereke yên jinan hatin ragihandin:

“*Li ser derxistina qanûnekê ku beşdariya çalak a jinan di meqamên biryardanê de garantî dike, di nav de kota ji bo nûnertiya jinan di saziyên sivîl, leşkerî û dîplomasî de, di heman demê de misogerkirina nûnertiya hemû civakên Sûrî.

*Aktîvkirina peymanên navneteweyî yên têkildarî mafên jinan û lihevhatina wan bi qanûnên Sûrî yên pêşerojê re da ku parastina mafên jinan garantî bike.

*Derxistina qanûnên ku tundiya dîjîtal û tacîza serhêl sûcdar dikin û peyda kirina mekanîzmayan ji bo ragihandin, ewlehî û piştgiriya psîkolojîk û qanûnî ji bo jinên hedefgirtî.”

Di warê aştiya sivîl û edaleta civakî de

“*Xurtkirina rola jinan di komîteyên lihevhatina herêmî û mekanîzmayên dîtina rastiyan de û kêmkirina tundiya civakê.

*Têkelkirina jinan di stratejiyên ji bo avakirina aştî û ewlehiya civakê de. Di warê hêza nerm, çand û medyayê de: Li ber çavan girtina çandê wekî beşek yekgirtî ya planên pêşkeftina domdar û avakirina aştiyê û veqetandina budçeyên têr ji bo piştgiriya sektora çandî.

*Parastina ziman û cihêrengiya çandî li Sûriyeyê û teşwîqkirina hilberîna wêjeyî, hunerî û medyayê bi van zimanan wekî beşek ji mîrateya neteweyî.

*Piştgiriya festîvalên çandî, wêjeyî, şanoyî, sînemayî û muzîkê wekî platformên ji bo diyalog û danûstandina çandî ya neteweyî. Veberhênan li pîşesaziyên afirîner û damezrandina fonên piştgiriyê ji bo projeyên çandî û hunerî yên jinan.

*Zêdekirina hebûna jinan di saziyên medyayê, çandî û hunerî de û hêzdarkirina wan di pozîsyonên serokatiyê û rêveberiyê de.”

Di warê hevkariya navneteweyî de

“*Damezrandina hevkariyên çandî yên navneteweyî ji bo pêşvebirina afirîneriya Sûriyeyê li seranserê cîhanê û perwerdekirina pisporên jin.

*Piştgiriya însiyatîfên herêmî yên Sûriyeyê ji bo baştirkirina wêneya mirovî ya Sûriyeyê.

*Hêzdarkirina jinan di warê çandî, wêjeyî, hunerî, medyayê, qanûnî û siyasî de ne tenê daxwazek femînîst e, lê projeyek neteweyî ye ji bo avakirina Sûriyeyek nûjen - Sûriyeyek ku hemû welatiyên xwe hembêz bike, rêzê li cihêrengiya wan bigire û bawer bike ku cûdahî çavkaniya dewlemendiyê ye û çand zimanê hevpar e ku her kesî yek dike.

*Pêşeroja Sûriyeyê ne tenê bi çekan, ne jî tenê bi danûstandinan, lê di heman demê de bi azadiya axaftinê, nivîsandinê, şano, sînema, muzîk, huner, medyaya berpirsiyar û ji hêla her jinek ku bawer dike ku afirînerî ne luks e, lê berpirsiyariyek li hember netewe û mirovahiyê ye, tê avakirin.”

Di dawiya forumê de, beşdaran bi hev re dirûşma “Jin Jiyan Azadî” qîr kirin.