Navenda Nûçeyan – Çeteyên Heyet Tehrir El Şam (HTŞ) ê cîhadîst duh êvarî li gundê Um El Tîna yê Dêr Hafirê komkujiyek kir. Di encamê de piranî jin, 7 sivîl mirin û 4 jî birîndar bûn.

Koordînasyona Kongra Star têkildarî komkujiyê daxuyaniyek nivîskî weşand.

Di destpêka daxuyaniyê de komkujî bi tundî hat şermezarkirin, ji malbatên qurbaniyan re sersaxî û ji birîndaran re jî şîfaya lezgîn hat xwestin.

Di daxuyaniyê de  hate diyarkirin ku demeke dirêj e çekdarên girêdayî hikumeta demkî ya Sûriyeyê êrîşên bi vî rengî li dijî sivîlan pêk tîne û eiha hate gotin: “Di demek wiha de ku em ji bo yekîtiya gelên Sûriyeyê têdikoşin û ji bo aramî û demokratîkbûna Sûriyeyê xebatên girîng dimeşînin, êrîşên bi vî rengî dijminatiya aramiya gelan nîşan dide.”

‘Ev komkujî hewldanek ji bo têkbirina yekîtiya gelan û jinên Sûriyeyî bû’

Di daxuyaniyê de îşaret bi vê yekê hat kirin ku komkujî di heman roja Konferansa Hevgirtina Jinên Sûriyeyî ku li Hesekê hatî li darxistin pêk hat û wiha domand: “Komkujiya ku di encama wê de piranî jin hatin qetilkirin, hewldanek ji bo têkbirina yekîtiya gelan û jinên Sûriyeyî bû. Tevahiya raya giştî dizane û dibîne ku ev demeke dirêje hewldanên gelên Sûriyeyê ji bo avakkirina jiyaneke demokratîk û aram têne kirin. Di vê çerçeveyê de jî gelek hevdîtin, diyalog û kombûn tên çêkirin. Lew ra jî êrîşên bi vî rengî yên hikumeta demkî dide nîşandan ku hemû hewldanên rêveberiya Şamê ew e ku van diyalog û hewldanên çareserkirinê bi şer pêşwazî bike.”

Di daxuyaniyê de bang li hikumeta veguhêz hat kirin ku hesabê komkujiyê bide û sûcdar werin darizandin.

‘Em ê hesab bipirsin’

Di daxuyaniyê de ev tişt hate gotin: “Em wekî Rêxistina Kongra Star em ê hesabê vê komkujiyê teqez bixwazin, nemaze ku jin û zarok bûne qurbanî. Bila herkes bizanibe ku hêza yekgirtî ya jinan wê rê nede êrîşên bi vî rengî û wê rê nede ku êrîşkar bê ceza bimînin. Em ê her deverê bikin cihê têkoşîn û hevgirtina jinên Sûriyeyî.”

‘Bêdengmayîn hevkariya sûcê ye’

Di daxuyaniyê de bang li tevahiya jinên Sûriyeyî hat kirin ku li hemberê pergala serdest a cihadîst têkoşîna xwe mezintir bikin û hevgirtina xwe xurttir bike.  Bang li hemû gelên Sûriyeyê jî hat kirin ku li hemberê van êrîşan rabin û li hemberî zihniyeta dijmin bi hevgirtina gelan bertek nîşan bidin.  Dîsa bang li raya giştî hat kirin ku bêdengmayîna li hemberî êrîşên li ser sivîlan hevkariya sûcê ye.