Ranya- Duh li navçeya Ranyeyê tevî baran, şilî û sermayê jî gelek welatparêz û azadîxwaz ji bo piştevaniya bi berxwedana parastina rûmetê ya Rojavayê Kurdistanê re li hev kom bûn û meşeke girseyî li dar xistin. Di meşê de dirûşma “Sînor bûne tepûtoz, berxwedan li we pîroz” hat berzkirin û dilsoziya ji bo Rojavayê Kurdistanê anîn ziman. Tişta ku vê meşê cuda kiribû, deng û rengê jinan bû ku weke her carê di rêzên pêş ên berxwedanê de dihatin dîtîn.

‘Yek e yek e yek e Kurdistan yek e’

Di meşa girseyî de Rêveberiya Çandê ya Raperînê gelek berhemên wêjeyî û hunerî yên ku êş û hêviyên gelê Kurd îfade dikirin pêşkêş kirin. Huner û wêje di vê çalakiyê de weke çeka parastina destkeftiyên neteweyî û çandî hatin nîşandan.

Jinan û beşdarên meşê bi dengekî dirûşmên “Yek e Yek e Yek e, Kurdistan Yek e” qêriyan û peyama “Başûr û Rojava yek beden in” dan raya giştî û cîhanê. Her wiha tekez kirin ku tu sînorên destçêkirî û siyasî yên li ser axa Kurdistanê nikarin pêşî li ruhê neteweyî yê hevgirtî yê gelê Kurd bigre.

Di dawiya çalakiyê de, girseya gel bi aramî di nava bazar û kolanên navçeya Ranyayê de meşiya, dirûşma “Bijî berxwedana Rojava” qîriya.