Mexmûr – Ji bo çareserkirina pirsgirêka nasname û ambargoya li ser Wargeha Penaberan a Şehîd Rûstem Cûdî (Mexmûr) şandeyek ji Meclîsa Gel ya Mexmûrê çûbûn Bexda.

Şande piştî  bi Wezareta Edaletê re hevdîtin kir û şûnde, li vegerê hate girtin.

Têkildarî mijarê Hevseroka Meclîsa Gel a Mexmûrê Filîz Bûdak ji ajansa re ragihand, Meclîsa Mexmûrê ji bo li ser pirsgirêka nasname û ambargoya  ya li ser gelê Mexmûrê daxwaz ji Wezareta Edaletê kiribû ku hevdîtinekê bikin.

Li ser vê yekê jî Wezaretê bersiv da Meclîsê û anîbû ziman ku wê ti pirsgirêk dernekeve.

Bûdak diyar kir ku Şandeya Meclisa Mexmûrê piştî li gel Wezaretê Edaletê hevdîtin kiriye û şûnde li derketina Bexda hatiye dîlgirtin.

Filîz Bûdak destnîşan kir ku 3 kes hatine girtin.

Hêjayî bibîrxistinê ye ku 10’ê Nîsanê û vir ve hikûmeta Iraqê ambargoyeke daniye ser Mexmûrê rê nade kelûpelên avahîsazî û binesaziyê bikevin Mexmûrê, her wiha rê nade karker biçin Bexda û nasnameyên xelkê Mexmûrê bi salane nû nakin.