سارا پورخەزری

 

کرماشان ـ ڕاپۆرتە خۆجێییەکان لە پارێزگای کرماشان لە ڕۆژهەڵاتی کوردستان، کاردانەوەی بەرفراوانیان بەدوای خۆیدا هێنا لەدوای ئەوەی کەناڵێک لە پلاتفۆرمی "تێلیگرام" وێنەی ژنانی ناوچەکانی جوانڕۆ، پاوە، ڕوانسەر و ثلاث باباجانیی بڵاوکردەوە، کەناڵەکە ئەم وێنەیانەی لە هه‌ژماره‌ کەسییەکان کۆکردبووەوە و بە لێدوان و دەستەواژەی نەشیاووەوە بڵاوی کردبوونەوە.

 

بەپێی زانیارییە بڵاوکراوەکان، هەندێک لە ژنان هەوڵیان داوە پەیوەندی بە بەڕێوەبەری کەناڵەکەوە بکەن بۆ سڕینەوەی وێنەکانیان، بەڵام ئەم هەوڵانە لەلایەن بەڕێوەبەری کەناڵەکەوە ڕەتکرانەوە وەک کاردانەوەش نامەکانیان دووبارە بڵاو کردەوە بۆ ئەوەی فشاریان بۆ بهێنن، بەدواداچوونەکان دەریدەخەن کە کەناڵەکە بە گۆڕینی ناونیشانەکانی بەردەوام بووە لە چالاکییەکانی.

 

ئەم ڕەفتارانە دەرئەنجامی توندی کۆمەڵایەتی و دەروونی لەو ناوچانەدا لێکەوتووەتەوە، بە شێوەیەک سەرچاوە ڕاگەیاندنەکان باسیان لەوە کردووە، کە فشارە دەروونی و کۆمەڵایەتییەکان ژمارەیەک لە ژنانی ناچار کردووە دەست بۆ ئازاردانی خۆیان بەرن، کە لە ئەنجامدا بووە هۆی گیانلەدەستدانی ئازیتا یوسفی، هەروەها ڕاپۆرتەکان ئاماژەیان بە تۆمارکردنی حاڵەتی توندوتیژیی خێزانی دژی هەندێک لە زیانبەرکەوتووان کردووە لەسەر بنەمای ئەم دزەپێکردنانە.

 

کلارە. ز، کە پەرستارە لە نەخۆشخانەی "ئیمام خومەینی" لە کرماشان، ڕوونیکردەوە، کە زانیاری لە هاوکارەکانیەوە پێگەیشتووە، وتی: چەند ڕۆژ پێش ئێستا هاوکارەکانم دڵنیایان کردمەوە کە نزیکەی ١٥ ژن بەم هۆیەوە خۆیان کوشتووە، ئێستا ئەم ژمارەیە ڕووی لە زیادبوون کردووە، ئەمەش دەریدەخات کە ژمارەی زیانبەرکەوتووان ڕۆژ بە ڕۆژ لە بەرزدەبێتەوە، بێ گومان لە زۆرینەی حاڵەتەکاندا، ئەو ژنانەی بەهۆی کاریگەری ئەم ڕووداوە خۆیان دەکوژن و دەگوازرێنەوە بۆ نەخۆشخانە، ناسنامەی خۆیان دەشارنەوە لە ترسی ئەوەی ناوەکانیان زیاتر لەنێو خەڵکدا نەبێتە باس.

 

مهری. ح، تەمەن ٣٨ ساڵ و دانیشتووی ڕوانسەر، باس لە کاریگەری ئەم ڕووداوە دەکات لەسەر ژیانی خۆی و خێزانەکەی، وتی: ئەم ڕووداوە بووە هۆی سەپاندنی سنوردارکردنی توند بەسەر جووڵەی ژناندا لەناو خێزاندا، بە جۆرێک کە زۆرینەیان بێبەش کران لە ئەنجامدانی پەیوەندی ڤیدیۆیی یان دەرچوون بە تەنها بەهۆی ترسی خێزانی لەوەی وێنەی نەبینراو بگیرێت و بەکاربهێنرێت بۆ لەکەدارکردنی ناوبانگ، کە ئەمەش لەوانەیە خێزانەکان ناچار بکات شارەکانیان جێبهێڵن.

 

وتیشی: حاڵەتی نیگەرانی و چاوەڕوانی فراوان بوو بۆ ئەوەی گشت ژنانی ناوچەکەم لە ڕوانسەر و جوانڕۆ بگرێتەوە، بە جۆرێک کە کەشوهەوا پڕ لە گرژییەکە هەندێکیانی ناچار کرد ڕێکاری خۆپارێزی بگرنەبەر وەک لەبەرکردنی دەمامک لە کاتی دەرچووندا، لەناو هەستێکی گشتیی ترس و نەبوونی پارێزراوی لە هەردوو مەیدانی دیجیتاڵی و کۆمەڵایەتیدا.

 

لە تاوانبارکردنی زیانبەرکەوتووەوە بۆ سنووردارکردنی ئازادیی ژنان

 

لە نێو ئەو کاردانەوەیانەی کە سەبارەت بە ڕووداوەکە بڵاوکراونەتەوە، هەندێک کەس پشتگیریان لە کارەکانی بەڕێوەبەری کەناڵەکە کردووە، یەکێک لە بەکارهێنەران ئەو هەنگاوەی بە "هۆشدارییەکی زۆر زیرەک و بەسوود" پێناسە کردووە و بانگەشەی ئەوە دەکات کە "قوربانیکردنی چەند کەسێک" دەتوانێت هەستی کەرامەت و پاراستنی کۆمەڵگە بگەڕێنێتەوە، ئەم جۆرە وەڵامانە ئەوەمان بۆ دەردەخات، جگە لە بڵاوکردنەوەی وێنە و هەراسانکردنی ژنان، دیدگایەک هەیە کە ژنان تاوانبار دەکەن لە تۆڕی کۆمەڵایەتی و بڵاوکردنەوەی وێنەکانیان، نەک شەرمەزارکردنی تاوانباران.

 

 

فریبا. ش، چالاکوانی مافی مرۆڤ، ڕوونیکردەوە، کە ڕەگەز ڕۆڵێکی سەرەکی دەگێڕێت لە ئاراستەکردنی سەرزەنشت و خستنەئەستۆی بەرپرسیارێتی لەسەر زیانبەرکەوتووان لەبری تیشکخستنە سەر خودی کردەوە تاوانکارییەکە، بە جۆرێک کە لەم جۆرە ڕووداوانەدا ژنان لەسەر بڵاوکردنەوەی وێنەکانیان لەسەر پلاتفۆرمەکان سەرزەنشت دەکرێن و وەک تاوانبار دەبینرێن تەنها لەبەر ئەوەی ژنن.

 

ئاماژەی بەوەشکرد، هەندێک بانگەوازی هاوسۆزی کە داوا لە ژنان دەکەن وێنەی کەسیی خۆیان لاببەن، دەکەونە تەڵەی تاوانبارکردنی زیانبەرکەوتووەوە، وتی: ئەم سزا کۆمەڵایەتییە توندانە فشارێکی دەروونی گەورەی دروستکردووە کە دەیان ژنی پاڵناوە بۆ زیانگەیاندن بە خۆیان، بووەتە هۆی مردنی یەکێکیان.

 

 

هەروەها جەختی لەوە کردەوە، کە نەبوونی روونی و لاوازیی لێشاوی زانیاری، ڕەهەندە تەواوەکانی ئازاری زیانبەرکەوتووان دەشارێتەوە، هۆشداری دا لە دووبارەبوونەوەی ئەزموونە پێشووەکان کە تێیدا کۆمەڵگە خۆجێییەکان سنووردارکردن و سەرکوتکردن دەسەپێنن کە بۆ چەندین ساڵ درێژدەبێتەوە بۆ ئەوەی گشت ژنانی ناوچەکە بگرێتەوە و لە ئازادی و چالاکییەکانیان بێبەشیان بکات، سەرەڕای ئەوەی هیچ تاوانێکیان نەکردووە.

 

هەروەها ئەزموونی بڵاوکردنەوەی وێنەی ژنان لە لورستان دەرخەری ئەوە بوو کە لەم جۆرە حاڵەتانەدا، لەبری تیشکخستنە سەر ئەنجامدەرانی توندوتیژی و پێشێلکارانی تایبەتمەندی، ژنان دەکەونە ژێر بڕیار و تاوانبارکردنی کۆمەڵگەوە، ئەمەش بارودۆخێکە کە دەتوانێت سنوردارکردنی زیاتر بەسەر ژیان و ئازادییاندا بسەپێنێت بە پشتبەستن بە چەمکەکانی وەک کەرامەت.