ناوەندی هەواڵ

 

زەهرا شەفیعی دەهەقانی نووسەر و فیلمسازی ئێران لە پێگەی فەرمی خۆی لە تۆڕی کۆمەڵایەتی ئێنستاگرام سەبارەت بە کشاندنەوەی فیلمەکەی خۆی لە فیستیڤاڵی نێودەوڵەتی ئەنیمەیشنی تانزانیت پەیامێکی بڵاوکردەوەو ڕایگەیاند، بڕیارمدا ئەنیمەیشنەکانم لە فیستیڤاڵی نێودەوڵەتی ئەنیمەیشنی تانزانیت بکشێنمەوە کە لە لایەن ئێرانەوە پاڵپشتی دارایی دەکرێت، لەبەر ئەوەی لاپەڕەکەی لە ئێنستاگرام پشتگیری لە ڕژێمی ئێران دەکات.

 

ئاماژەی بەوەشکرد، مەحاڵە لە پێناو بەرژەوەندییەکانم پێ بخەمە سەر خوێنی منداڵانی گەلی ئێران و هەنگاو بخەمە سەر ژیانی وێرانکراوی ژنان و گەنجان، یان ئەو زیندانییە سیاسیانەی لە زیندانەکانی ئێراندا لە ئازار و ئەشکەنجەدان.

 

هاوکات، نووسەری کتێبی “نامەیەک لە ژنێکی ئێرانییەوە بۆ ستیڤن هۆکینگ”ـە، کارە هونەرییەکانی بریتین لەوانە، “دیوی دراوەکە”، “شا شین” ، “لە دیلی پەنجەیەک”، کورتە فیلمێک بە ناوی “غیرەت، باڵاپۆشی، سەتەلایت ” و “دۆکیۆمێنتاری بەندیخانە (شێرپەنجەی پێشکەوتوو)”، سیناریۆی فیلمی درێژی “The Other Side” لە نێو کارەکانییەتی، کە بەشداری لە چەندین فێستیڤاڵی بەناوبانگی سیناریۆنووسی کردووە.

 

لە ١٦ی ئەیلوولی ٢٠٢٣ و هاوکات لەگەڵ یەکەمین ساڵیادی شۆڕشی”ژن ژیان ئازادی” زەهرا شەفیعی دەهەقانی لە شاری تارانی ئێران لە لایەن هێزەکانی وەزارەتی ئیتلاعاتی ئێران جارێکی دیکە دەستگیر کرایەوە و لە لایەن لقی ٢٦ـی دادگای شۆڕشی تاران بە سەرۆکایەتی دادوەر ئیمان ئەفشاری بە نۆ ساڵ و شەش مانگ زیندانی سزا درا.

 

جێگای ئاماژەیە، لە مانگی ئایاری ٢٠٢٤ بەهۆی ئەشکەنجەدانی زۆرەوە لە لایەن هێزەکانی ئیتلاعاتی ئێرانەوە تووشی جەڵتەی مێشک بوو و بۆ نەشتەرگەری مێشک و لابردنی گرێ لە نەخۆشخانە خەوێندرا، دواتر بە شێوەی کاتی ئازاد کرا.