نوپەلدا دەنیز

 

مەخموور - لە ساڵی ٢٠١٩ەوە حکومەتی پەدەکە گەمارۆی سەر کامپی پەنابەرانی شەهید ڕۆستەم جودی (مەخموور)ی سەپاندووە، هەروەها نەتەوە یەکگرتووەکان ساڵانێکە هاوکارییەکانی بۆ کامپەکە بڕیوە، بێگومان ژنان ئەوانەن کە زۆرترین کاریگەری ئەم دۆخەیان لەسەرە، هەرچەندە ژنان لە ژیاندا چالاکن، بەڵام بڕینی هەلی ئابووری و داهاتوو و کار، چالاکیی ژنانی لەناو کامپەکەدا کەمکردووەتەوە.

 

هاوکات دامەزراوەی ژنانی مەخموور خەریکی پەرەپێدانی پڕۆژە و چالاکی نوێیە بۆ بەهێزکردنی ژنان لە هەموو بوارێکی ژیاندا، بەشی دروومانی دەزگای ژنان هەلی کار و خۆپەروەردەکردن بۆ ژنان دەڕەخسێنێت، بەهۆی کەمی دەرفەتەکان، زۆرێک لە ژنان خولی بەرگدروویان کردۆتەوە، تا ئێستا زیاتر لە ١٥٠ ژن دەرفەتی فێربوونیان بۆ ڕەخساوە، ئەمساڵیش بەهەمان ئامانج پێشبڕکێیەکی چنین دەستیپێکرد و ژمارەیەکی زۆر لە ژنانیش بەشدارییان کرد. 

 

لە کۆتا ڕۆژی پێشبڕکێکەدا واتە ٦ی ئادار، سەرجەم ئەو ژنانەی بەشداری پێشبڕکێکەیان کردووە، بەرهەمەکانیان پێشکەش دەکەن، ئەو ژنانەی لە پێشبڕکێکەدا پلەی یەکەمیان بەدەستهدەهێنن خەڵات وەردەگرن و ئەوانەی بەشدارییان کردووە بڕوانامە وەردەگرن.

 

ئەو ژنانەی بەشداربوون لە پێشبڕکێکە قسەیان بۆ ئاژانسەکەمان کرد و ڕایانگەیاند کە ئامانجی پێشبڕکێ و پێشانگاکە کۆکردنەوەی ژنان و پێشکەشکردنی هونەری نوێیە.

 

"ژن دەتوانێت هەر کارێک بیەوێت بیکات"

 فاتمە نێروەهی باسی لە گەشتەکەی کرد لە بواری درووماندا و وتی: کاتێک بیستم کارێک بۆ پێشکەوتنی ژنان هەیە، یەکسەر داواکاریم پێشکەش کرد بۆ ئەو کارە بۆ ئەوەی پێویستم بە کەس نەبێت، ژن دەتوانێت هەرچییەک بیەوێت بیکات، گرنگ نییە هەرچییەک بێت، سەرەتا بە دەست چنیم، دواتر دوکانێکی چنین کرایەوە و سێ ساڵ لەوێ کارم کرد، دوای ماوەیەک لەوێ ڕۆیشتم و چوومە ناو باخچە کارمکرد، دوای ئەوەی دەرفەتێکم بۆ ڕەخسا، ئامێری دروومانم کڕی و لە ماڵەوە بەردەوام بووم لە دورین، هەموو جۆرە دورینێک دەکەم، بەڵام زیاتر جلوبەرگی فۆلکلۆر دروست دەکەم.

 

 "کاری قورس باشترین کارە"

 فاتمە نێروەهی ئاماژەی بەوەدا کە ئەو کارانەی بە ماندووبوون ئەنجام دەدرێن زۆر بەنرخن و لە کۆتایی قسەکانیدا وتی: تەنانەت لەم تەمەنەشدا هەرگیز لە ڕووی داراییەوە پێویستم بە کەس نەبووە، داوا لە هەموو ژنان دەکەم هەر کارێک لە توانایاندایە، بە دەستی خۆیان ئەنجامی بدەن و پشت بە کەسی دیکە نەبەستن.

 

"ئەم کارە گەشەسەندنی گەورە لە مرۆڤدا دروست دەکات"

 قەدری میژینی جەختی لەوە کردەوە کە پێویستە ژنان فێری هەموو کارێک بن و وتی: سەرەتا پەیوەندیم بە خولی دروومانەوە کرد، ئێستا پەیوەندیم بەو پێشبڕکێیەوە کردووە، هەموو ژنانی ناو کامپەکە دەتوانن بێنە ئێرە بۆ فێربوونی ئەم کارە، پێشکەوتنێکی زۆر باش بۆ مرۆڤەکان دروست دەکات، پێویستە ژنان هەر کارێک لەبەردەستدا بێت ئەنجامی بدەن، نەک تەنها دورین و بەشداری لە خولەکانی پەروەردەدا بکەن.

 

"ئامانجی پێشبڕکێکە پەرەپێدانی کاری دەستییە"

هەروەها چیمەن بەنەک، وتەبێژی بەرگدرووی دامەزراوەی ژنان، ڕاگەیاند: ساڵێک لەمەوبەر پەیوەندیم بە خولی دروومانەوە کردووە، ئامانجم بۆ ئەم کارە ئەوە بوو کە بزانم چۆن دەتوانم خۆم باشتر بکەم، بۆ ئەمە وانەی دورینم وەرگرت، لەم بوارەدا پەرەم بە خۆم داوە و ئێستا کاری دروومان دەکەم.

 

"دوای ماوەیەک بوومە وتەبێژی خولی دروومانەکە"

چیمەن بەنەک باسی لە ئامادەکارییەکان بۆ پێشبڕکێکە کرد و وتی: نزیکەی دوو مانگە خۆمان بۆ پێشبڕکێکە ئامادە دەکەین، ئامانجی ئەم پێشبڕکێیە ئەوەیە کە نیشان بدرێت ژنان چۆن دەتوانن کارەکانی خۆیان بەرەوپێش ببەن و چۆن دەتوانن لەم جۆرە کۆبوونەوانەدا خۆیان دەرببڕن.

 

 "٨ی ئادار مێژووی پێشبڕکێکە مانادار دەکات"

 چیمەن بەنەک جەختی لە گرنگی مێژووی پێشبڕکێکە کردەوە و وتی: دەمانەوێت پێشبڕکێکەمان لە نزیک ٨ی ئادار، ڕۆژی جیهانی تێکۆشانی ژنان ئەنجام بدەین، لەبەرئەوەی ژنان وەک کەسێکی کەمتر سەیر دەکرێن و پێشینەی ستەمکارییان هەیە، هەروەها دەمانەوێت ئەم ڕۆژە بەکاربهێنین بۆ نمایشکردنی کارەکانی ژنان و بڵێین ژن بوونی هەیە و دەتوانێت لە هەموو بوارێکدا پێشبکەوێت.