بەشی ڕاگەیاندن لە کۆلیژی زانستە مرۆڤایەتییەکانی زانکۆی ھەڵەبجە، تاقیگەیەکی میدیایی بەبڕی ١٠ ھەزار دۆلاری ئەمریکیی دەکاتەوە.

ژنها – هەڵەبجە

 

لە یادکردنەوەی ٣٣یەمین ساڵیادی کیمیابارانی ھەڵەبجەدا تاقیگەیەکی میدیایی بۆ خوێندکارانی بەشی ڕاگەیاندنی کۆلیژی زانستە مرۆڤایەتییەکانی زانکۆی ھەڵەبجە دەکرێتەوە و چەند چالاکییەکی خوێندکارانی بەشەکە نمایش دەکرێن.

 

د.ھەتاو حەمەساڵح، سەرۆکی بەشی ڕاگەیاندن لە زانکۆی ھەڵەبجە لە لێدوانێکیدا بۆ ئاژانسی ژنها ئاماژەی بەوەدا کە تاقیگە میدیاییەکە لە ستۆدیۆیەک و ژوورێکی کۆنترۆڵ و پێداویستییەکانی ناوی پێکدێت، ئامانج لێی سوود لێوەرگرتنی کرداریی خوێندکارانی بەشی ڕاگەیاندنە لەو بابەتە زانستییانەی بەدرێژایی چوار ساڵ دەیانخوێنن و دواتر بڕوانامەی بەکالۆریۆس وەردەگرن.

ھەروەها وتیشی: "بە سوپاسەوە ڕاگری کۆلێژ و سەرۆکی زانکۆ و وەزیری خوێندنی باڵا، ھاوکاری سەرەکی بوون لە پەسەندکردن و دابینکردنی پێداویستییەکانی بەشەکەماندا"

 

زانکۆی ھەڵەبجە لەساڵی خوێندنی ٢٠١٩-٢٠٢٠ بەشی ڕاگەیاندنی لە کۆلیژی زانستە مرۆڤایەتییەکان کردەوە و ساڵانە دەرچووانی ١٢ی ئامادەیی وەردەگرێت.

 

زنجیرە چالاکییەکان بۆ ساڵیادی کیمیابارانی هەڵەبجە لە پاریزگای هەڵەبجە ساڵانە بە چالاکی جۆراوجۆر یادی دەکرێتەوە، بۆ ئەمساڵیش کردنەوەی تاقیگەی بەشی ڕاگەیاندن کرایەوە بۆ خوێندکارانی هەڵەبجە و هەر ئەمڕۆ چەندین چالاکی جۆراوجۆر لە هەڵەبجەدا ڕێکخرا بۆ ساڵیادی کیمیابارانی هەڵەبجە.

 

ت.پ