سۆزدار ئاڤێستا: یەژەشە لە ڕۆژهەڵاتی ناوەڕاست بووەتە هێمای ویست و بەرخۆدانی ژنان
سۆزدار ئاڤێستا، ئەندامی ئەنجومەنی سەرۆکایەتی گشتی کەجەکە، شنگالی وەک بەشێکی گرنگی پرۆسەی ئاشتی و کۆمەڵگەی دیموکراتیک هەڵسەنگاند و وتی: هەنگاوی یەکخستنەوە لە شنگال هەنگاوێکی گرنگە بۆ گەلی ئێزدی، گرنگترین شت خۆپاراستنە.
ناوەندی هەواڵ
سۆزدار ئاڤێستا، ئەندامی ئەنجومەنی سەرۆکایەتیی گشتیی KCK، لە بەرنامەی تایبەتیی کەناڵی ستێرک تیڤی، پرۆسەی ئاشتی و کۆمەڵگەی دیموکراتیک، هەنگاوی یەکخستنەوە لە شنگال و ڕووداوەکانی ڕۆژئاوای کوردستانی هەڵسەنگاند.
«پێویستە لیژنەی چاودێری دامەزرێت و بەڵێنە دراوەکان جێبەجێ بکرێن»
سۆزدار ئاڤێستا، لە سەرەتای هەڵسەنگاندنەکانی خۆیدا، بە ناوی بێریتان هێڤی، یادی هەموو شەهیدانی خەباتی ئازادی و شەهیدانی مانگی تشرینی یەکەمی کردەوە و بە ڕێز و حورمەت و پێزانینەوە باسیان کرد و وتی:
«پرۆسەکە تا ئێستا ئەو هەنگاوە کردارییانەی کە گەلی کورد چاوەڕێیان دەکات، نەهێناوەتە دی. جوڵانەوەی ئازادی ئەو ئەرکانەی کە کەوتبوونە ئەستۆی، جێبەجێ کردووە، بەڵام ئێستا دەوڵەتی تورکیا دەبێت وەڵامی ئەمە بداتەوە و هەنگاوی کرداری بنێت. بە تایبەتی پێویستە ڕێبەر ئاپۆ لە بارودۆخێکی ئازاددا کار بکات و وەک ئەندازیار و هاوئاهەنگکەری پرۆسەکە ڕۆڵی خۆی بگێڕێت. هەروەها دەبێت لیژنەی چاودێری دامەزرێت و بەڵێنە دراوەکان جێبەجێ بکرێن.
دەوترێت دەوڵەتی تورکیا پرۆسەکە بەپێی بەرژەوەندییە سیاسییەکان و حساباتی هەڵبژاردن دوا دەخات. جوڵانەوەی ئازادییش ڕایدەگەیەنێت کە چاوەڕێ نامێنێتەوە و خەباتی خۆی بۆ ئازادی و دیموکراسی بە ڕێگاکانی دیموکراتیک بەردەوام دەکات.»
«ئەم هەنگاوە بۆ بوون، ناسنامە و مافەکانی کۆمەڵگەی ئێزیدی گرنگە»
سۆزدار ئاڤێستا، سەبارەت بە یەکخستنەوەی YBŞ و YJŞ لەگەڵ هێزەکانی سوپای عێراقیش، بەم شێوەیە قسەی کرد:
«لە ٢٦ی تشرینی یەکەمدا، لە لووتکەی چیای شنگال، وەک ئەنجامی بەرخۆدان و خەباتی ١٢ ساڵەی کۆمەڵگەی ئێزیدی و قوربانیدانی ٥٣٠ شەهید، هەنگاوێکی گرنگ نرا. ئەم هەنگاوە ئەنجامی بیر و فەلسەفەی ڕێبەر ئاپۆ و ماندووبوون و بەرخۆدانی کۆمەڵگەی ئێزیدییە.
یەکخستنەوەی YBŞ و YJŞ لەگەڵ هێزەکانی عێراق وەک پەڕەیەکی نوێی مێژوویی هەڵدەسەنگێنرێت. هەروەها دەوڵەتی عێراق بەڵێنی داوە مافەکانی کۆمەڵگەی ئێزیدی بپارێزێت و مسۆگەر یان بکات. ئەم هەنگاوە بۆ بوون، ناسنامە و مافەکانی کۆمەڵگەی ئێزیدی گرنگە، بەڵام سەرکەوتنی بە جێبەجێکردنی کرداریی ئەو بەڵێنانەوە بەستراوەتەوە.
پێویستە کۆمەڵگەی ئێزدی بە ئازادی لەسەر خاکی خۆی بژی، خۆی بپارێزێت و خەباتی دیموکراتیکی خۆی بەردەوام بکات. بەشداریکردنی YJŞ لەم یەکخستنەوەیەدا هەنگاوێکی بەڕێز و گرنگە.
پرۆسەی شنگال بەشێکی گرنگە لە پرۆسەی ئاشتی و کۆمەڵگەی دیموکراتیک لە هەموو کوردستاندا. بەپێی هەڵسەنگاندنی ڕێبەر ئۆجالان، هێرشەکەی سەر کۆمەڵگەی ئێزیدی، هێرشە لەسەر هەموو گەلی کورد. بۆیە لە ١٢ ساڵی ڕابردوودا، بە دیدگای ڕێبەر ئۆجالان خەباتێکی گەورە کراوە، بۆ ئەوەی کۆمەڵگەی ئێزدی جارێکی تر بتوانێت خۆی بپارێزێت و بە ئازادی لەسەر خاکی خۆی بژی.
لەو پرۆسەیەدا کۆمەڵگەی ئێزدی لە ڕووی فکری، کەلتووری، هونەری و خۆپاراستنەوە ویستی خۆی دروست کردووە. ڕێبەر ئۆجالان ئەم پرۆسەیەی بە ڕۆنەسانسی ئێزیدیخان ناوبردووە. ئامانجی سەرەکی ئەوەیە کە کۆمەڵگەی ئێزیدی ڕێکخراو بێت، خۆی بپارێزێت و جارێکی تر ڕووبەڕووی فەرمان نەبێتەوە. یەکخستنەوەی ئێستاش لەم چوارچێوەیەدا هەڵدەسەنگێنرێت و وەک ئەنجامی خەباتی ١٢ ساڵە و پرۆسەی ئاشتی و کۆمەڵگەی دیموکراتیک لێک دەدرێتەوە.»
«YJŞ لە ڕۆژهەڵاتی ناوەڕاست بووەتە هێمای ویست و بەرخۆدانی ژنان»
سۆزدار ئاڤێستا ئاماژەی بەوە دا کە YJŞ لە ڕۆژهەڵاتی ناوەڕاست بووەتە هێمای ویست و بەرخۆدانی ژنان و وتارەکەی بەردەوام کرد:
«دوای فەرمانی ٣ی ئابی ٢٠١٤ و ڕفاندنی هەزاران ژن و منداڵی ئێزدی، جوڵانەوەی ئازادیی ژنان بەڵێنی دا کە تۆڵەی ژنانی ئێزیدی دەستێنێتەوە. ئەم تۆڵەسەندنەوەیە بە دروستکردنی ویستی ژنانی ئێزیدی و هێزی خۆپاراستنیان پێناسە کرا.
بە پێشەنگایەتیی شەڕڤانانی YJA Star و پشتگیریی دایکانی شنگال و TAJÊ، YJŞ وەک هێزێکی پاراستن دامەزرا. هەنگاوی تۆڵەسەندنەوەی ژنانی ئێزدیش لە ساڵی ٢٠١٦ دەستی پێکرد. ئەمڕۆ بەشداریکردنی YJŞ لەناو سوپای عێراقدا وەک هەنگاوێکی مێژوویی بۆ ژنانی ئێزدی و هەموو ژنانی عێراق هەڵدەسەنگێنرێت.
ڕێککەوتنەکەی شنگال گرنگە، بەڵام یەکخستنەوەی سەربازی بە تەنها چارەسەری کێشەکانی کۆمەڵگەی ئێزیدی ناکات، چونکە کێشەی ئێزیدییەکان تەنها سەربازی نییە، بەڵکو سیاسی و کۆمەڵایەتی و کەلتووریشە.
بۆیە لەگەڵ یەکخستنەوەی سەربازیدا، دەبێت مافی بەڕێوەبردنی ناوخۆیی، ناسنامە، باوەڕ و کەلتووری کۆمەڵگەی ئێزیدی بناسرێت. هەروەها لەوانەیە بۆ مسۆگەرکردنی ئەم مافانە هەندێک گۆڕانکاریی یاسایی پێویست بن. ئامانج ئەوەیە ویستی کۆمەڵگەی ئێزدی بپارێزرێت و بتوانێت بە ئازادی و ئاسایش لەسەر خاکی خۆی بژی.»
«لەسەر یەکخستنەوەی کۆمەڵگەی ئێزدی، هەندێک لایەن هەڵوێستی دوژمنکارانە و ڕەگەزپەرستانە و فریودەرانە دەگرنەبەر»
سۆزدار ئاڤێستا، دوای ئەوەی جەختی لەسەر پێویستی پاراستنی مافەکانی کۆمەڵگەی ئێزدی و ڕۆڵی YBŞ و YJŞ کردەوە، وتی:
«بۆ ئەمە یەکگرتوویی و پشتگیریی هەموو ئێزیدییەکانی شنگال و ئەوانەی لە دەرەوەی وڵاتن گرنگە. نابێت ئەم پرۆسەیە ببێتە هۆی سستی، بەڵکو دەبێت هەنگاوە بەڵێندراوەکان بەدواداچوونیان بۆ بکرێت و لە کردەوەدا جێبەجێ بکرێن.
لەسەر یەکخستنەوەی کۆمەڵگەی ئێزدی، هەندێک لایەن هەڵوێستی دوژمنکارانە، ڕەگەزپەرستانە و فریودەرانە دەردەبڕن. بە تایبەتی بابەتی ئەوەی ئێزیدییەکان کوردن یان نا و بۆچی لەگەڵ عێراق یەکخستنەوەیان کردووە، وەک ئامرازێک بۆ دروستکردنی پڕۆڤۆکاسیۆن بەکاردەهێنرێت.
بەڵام دەبێت کۆمەڵگەی ئێزدی بە ویستی خۆی خۆی پێناسە بکات و هیچ کەس مافی ئەوەی نییە ناسنامەیەکی بەسەردا بسەپێنێت. یەکخستنەوەی سەربازی بەپێی دەستووری عێراق ئەنجام دراوە، چونکە شنگال دوای ساڵی ٢٠٠٣ بێ ستاتۆس و بێ بەڕێوەبەرایەتییەکی دیاریکراو ماوەتەوە.
بۆیە لە جیاتی پڕۆڤۆکاسیۆن و ناکۆکی، دەبێت پشتگیریی ئەم پرۆسەیە بکرێت. گرنگە کۆمەڵگەی ئێزدی یەکێتیی خۆی بەهێز بکات، لە دەوری ماف و دەستکەوتەکانی کۆببێتەوە و بە ویستی خۆی چارەنووسی داهاتووی خۆی دیاری بکات.»
سۆزدار ئاڤێستا، ئاماژەی بەوە دا کە کۆمەڵگەی ئێزدی لە سەرانسەری کوردستان و چەندین وڵاتی دەرەوەی وڵات بڵاو بووەتەوە و وتی:
«بۆیە ئەم پرۆسەیە دەرفەتێکی مێژووییە بۆ دروستکردنی یەکێتیی کۆمەڵگەی ئێزیدی. هەرچەندە بۆچوونە سیاسییەکان جیاوازن، بەڵام دەبێت هەمووان لە دەوری ناسنامە، بوون و مافەکانی کۆمەڵگەی ئێزیدی یەک بگرن.
بۆ دروستکردنی بەڕێوەبەرایەتییەکی ناوخۆییی ئازاد و دیموکراتیک، یەکێتیی سیاسی و هاوبەشی لە پاراستندا گرنگە. هەروەها دەبێت مافی کۆمەڵگەی ئێزیدی بۆ سەردانکردنی شوێنە پیرۆزەکانی خۆی، بە تایبەتی لالەش و چیای شەنگال، مسۆگەر بکرێت. پاراستنی لالەش و بوونی کۆمەڵگەی ئێزیدی پەیوەندییەکی توندوتۆڵیان بە یەکەوە هەیە.
بۆیە بانگ لە هەموو ئێزدییەکانی کوردستان و دەرەوەی وڵات دەکرێت کە پشتگیریی ئەم پرۆسەیە بکەن، ناکۆکییەکانیان بخەنە لاوە و بۆ یەکێتیی کۆمەڵگە هەوڵ بدەن.»
بانگەوازی یەکێتی
سۆزدار ئاڤێستا، ئاماژەی بە یەکخستنەوەی ڕۆژئاوای کوردستانیش کرد و وتی:
«هێرشە ڕەگەزپەرستانەکانی سەر گەلی کورد لە ڕۆژئاوای کوردستان وەک پڕۆڤۆکاسیۆن و دەستێوەردان لە پرۆسەی ڕێککەوتن هەڵدەسەنگێنرێن و دەبێت مەحکوم بکرێن. ئەم هێرشانە ڕووداوی تاکەکەسی نین، بەڵکو پلانێکن کە دەیانەوێت ماف و ویستی گەلی کورد لەناوببەن.
بۆ سەرکەوتنی پرۆسەی یەکخستنەوەی دیموکراتیک، دەبێت حکومەتی دیمەشق ئاسایشی ئەو گەلانە مسۆگەر بکات کە دەگەڕێنەوە شوێن و ماڵەکانیان، بە تایبەتی لە عەفرین، کۆبانێ، حەسەکە، سەرێ کانیێ و گرێ سپی، هەروەها لەگەڵ هێزەکانی ئاسایشی ڕۆژئاوای کوردستان هاوئاهەنگی بکات.»
سۆزدار ئاڤێستا، بەو وتانەی خوارەوە کۆتایی بە هەڵسەنگاندنەکانی خۆی هێنا:
«دەبێت ڕێگری لە هێرشەکانی چەتەکان بکرێت و گەلی کورد بپارێزرێت. یەکخستنەوەی دیموکراتیک بەو مانایە نییە کە خەبات و خۆپاراستن بوەستێت. بە پێچەوانەوە، پاراستنی گەل مافێکی ڕەوا و بنەڕەتییە.
بۆیە بانگ لە هەموو گەلی کورد و دامەزراوە و دەزگاکانی ڕۆژئاوای کوردستان دەکرێت کە لە بەرامبەر ئەم هێرشانەدا یەکێتی و هەڵوێستی هاوبەش نیشان بدەن و ئەرکەکانی خۆیان جێبەجێ بکەن.»