ناوەندی هەواڵ

 

دوای ئەوەی بەهۆی پەیوەندییکردنی بە داعش و بەکۆیلەکردنی ئێزدییەکاندا، لە مانگی شووباتی ئەمساڵ لەلایەن دادگاوە سزای ١٢ ساڵ زیندانی بەسەر لینا ئیسحاقدا سەپێندرابوو، دادگای تێهەڵچوونەوەی سوید، سزاکەی پەسەند کرد.

 

بەپێی زانیارییەکان، لینا ئیسحاق تەمەنی ٥٢ ساڵە و لە ساڵی ٢٠١٣ بە مەبەستی پەیوەندیکردن بە داعشەوە لەگەڵ خێزانەکەی خۆیان گەیاندووە بە سووریا و لە شاری ڕەقە نیشتەجێبوون.

 

بەپێی شایەتحاڵان کە لە پرۆسەی دادگاییکردنەکەیدا شایەتییان داوە، لینا ئیسحاق لەو ماوەیەی کە لە سووریا بووە، سێ ژن و شەش منداڵی ئێزدی لە ماڵەکەیدا بەدیل گرتووە و وەک کۆیلە مامەڵەی لەگەڵ کردوون.

 

هەروەها وێڕای ئەوەی کە ئەو کەسانەی ناچارکردووە ببنە موسڵمان، بەشێوەی زارەکی و جەستەیی ئازاری داون و لە دامرکانەوەی حەزی چەکدارانی داعش بەکاری هێناون.

 

هەرچەندە لینا ئیسحاق ڕەتیکردووەتەوە کە لە ماڵەکەیدا کردەوەی لەو شێوەیە ئەنجام درابێت، بەڵام دادگا بە بەڵگەی شایەتحاڵان سزاکەی دەرکردووە.