ناوەندی هەواڵ

 

 دوای ١١ ڕۆژ لە ڕووخانی حکومەتی بەعسی لە سووریا ڕێکخراوی جیهادیی تەحریر شام، سەدان کەس بە بەشداری ژنانیش لە گۆڕەپانی ئومەوی دیمەشقی پایتەختی سووریا ناڕەزایەتییان دەربڕی و داوای دیموکراسی و مافەکانی ژنانیان کرد.

 

بەپێی هەواڵی ئاژانسی فرانس پرێس، ئەو چالاکوانانەی بۆ داواکردنی دیموکراسی و مافی ژنان کۆبوونەوە، لە گۆڕەپانی ئومەوی دیمەشق، دروشمی "دەوڵەتی ئایینیمان ناوێت، دەوڵەتێکی دیموکراسیمان دەوێت"، "سووریایەکی ئازاد و پێشکەوتوو"، "گەلی سووریا یەکن"یان وتەوە.

 

ماجیدە مودەرەس، فەرمانبەری خانەنشینکراو لە چالاکییەکەدا بەشداری کرد و بە ئاژانسی فرانس پرێسی ڕاگەیاندووە، "هەم ژن و هەم پیاو ڕۆڵیان هەیە لە بنیادنانی سووریایەکی نوێدا، ڕۆڵی ژن لە سیاسەتدا زۆر گرنگە. ئێمە پەیڕەوی لێدەکەین و هیچ هەڵوێستێک لە دژی ژنان قبوڵ ناکەین. سەردەمی بێدەنگیمان تێپەڕی".

 

لە بەیاننامەیەکی ڕۆژنامەوانیدا، وتەبێژی ئیدارەی سیاسی حەیات تەهری شام، عوبەیدە ئەرناوت، ڕایگەیاندووە، “سروشتی جەستەیی، بایۆلۆژی و دەروونی ژنان ڕێگە نادات ژنان وەک وەزیری بەرگری ڕۆڵ بگێڕن”. هاوڵاتیان و چالاکوانانی ژن و پیاوان ناڕەزایی خۆیان لە بەرامبەر ئەم لێدوانە دەربڕی.