لە سەرەتای ئەمساڵەوە تا ئێستا ٤٤ ژن لەسێدارە دراون
بەپێی ڕاپۆرتی ڕێکخراوی مافی مرۆڤی ئێران، لە سەرەتای ئەمساڵەوە تا ئێستا ٤٤ ژن لە ڕۆژهەڵاتی کوردستان و ئێران لەسێدارە دراون و هەروەها، ژنانی زیندانی سیاسیی لە هەلومەرجێکی دوور لە ستانداردە مرۆیی و یاساییەکاندا ڕاگیراون.
ناوەندی هەواڵ
ڕێکخراوی مافی مرۆڤی ئێران بە بۆنەی هەڵمەتی ١٦ ڕۆژەی بەرەنگاربوونەوەی توندوتیژی دژی ژنان ڕاپۆرتێکی بڵاوکردەوە.
لە ڕاپۆرتەکەدا هاتووە، لە سەرەتای ئەمساڵەوە تا ئێستا ٤٤ ژن لە ڕۆژهەڵاتی کوردستان و ئێران لەسێدارە دراون، لەسێدارەدانی ژنان تەنها بە تاوانی دیاریکراوەوە سنووردار نییە، بەڵکو بووەتە ئامرازێک بۆ فشاری سیاسی، کۆمەڵایەتی و ئابووری.
ئاماژە بەوەشکراوە، ژنانی زیندانی سیاسیی لە هەلومەرجێکی دوور لە ستانداردە مرۆیی و یاساییەکاندا ڕاگیراون و زۆرجار ڕووبەڕووی فشاری دەروونی و هەڕەشەی ئەمنی دەبنەوە، هەروەها لە هۆڵێكی قەرەباڵغدا دەژین و لە خزمەتگووزارییە سەرەتاییەکانیان بێبەشن، ئەوەش کاریگەری لەسەر بارودۆخی تەندرووستییان درووست دەکات.
باس لەوەشکراوە، ژنان لە ڕۆژهەڵاتی کوردستان و ئێران لە ماوەی ٤٠ ساڵی ڕابردوودا بە بەردەوامی بەرەنگاری جیاکاری و سنووردار کردن بوونەتەوە، ئەوان نیشانیانداوە کە بۆ بەدەستهێنانی مافەکانیان بەهێز و پێداگرن و بۆ ئازادی و یەکسانی تێدەکۆشن، ئەوان سەلماندوویانە کە دەتوانن کۆمەڵگەیەکی دادپەروەر و بێ توندوتیژی بنیات بنێنن.
لە کۆتایی ڕاپۆرتی ڕێکخراوی مافی مرۆڤی ئێراندا هاتووە، ئەم بارودۆخە پێویستی بەپەلەی کۆمەڵگەی نێودەوڵەتی و ڕێکخراوەکانی مافی مرۆڤە بۆ ئیدانەکردنی ئەم کردارە و پشتیوانیکردن لە مافەکانی ژنان.