ناوەندی هەواڵ

 

ئەمڕۆ لە بەردەم کەمپی نوێی زانکۆی سلێمانی لە شاری سلێمانی گردبوونەوەیەک بە بەشداری خوێندکارانی ڕاگەیاندن، زانستە سیاسییەکان و بەشی پەیوەندییە کۆمەڵایەتییەکاندا ئەنجامدرا و لە کۆنگرەیەکی ڕۆژنامەوانیدا خوێندکاران داوایان کرد سزای زیندانی ڕۆژنامەنووسانی بادینان هەڵبوەشێتەوە.

ئەمیر والی، بەیاننامەی خوێندکارانی خوێندەوە و تێیدا هاتبوو "داوا لە خەڵکی کوردستان دەکەین لە ئاست ئەم زەبر و ناڕەوایەتییەدا بێدەنگ نەبن و هەڵوێستیان هەبێت، ئەگەر نا ئەم دۆخەی ئێستا چالاکوانانی زیندانکراوی تێدایە ڕۆژێک دێت ڕوبەڕووی هەمومان دەبێتەوە".

هەروەها داوایان ئاراستەی دادوەران و یاساناسان کرد " هیوادارین فشار بکەن لە دادگای پێداچوونەوەی هەرێمی کوردستان بۆ ئەوەی لە تەمیزکردنەوەی ئەم کەیسەدا بتوانن بێلایەنبن و بڕیارێکی دادوەرانە و مرۆییانە بدەن، بۆ ئەوەی ئازادیخوازان ئازاد بکرێن و بە کەسوکاری خۆیان شادببنەوە".

 

بە وتنی دروشمی ئازادی بۆ ئازادیخوازان سەرشۆڕی بۆ ستەمکاران کۆتایی بە گردبوونەوەکە هات.

 

ت.پ