بناری قەندیل 

 

لە ٢٢ی کانوونی دووەم، لە گوندی سێوەیسی سەر بە بناری قەندیل، بە بەشداری توێژە جیاوازەکانی کۆمەڵگە، گردبوونەوەیەکی ناڕەزایەتی دژی پیلانگێڕی و هێرشە داگیرکارییەکانی سەر ڕۆژئاوای کوردستان بەڕێوەچوو. گردبوونەوەکە بە درووشمی "دژی داگیرکەران" و بەرزڕاگرتنی گیانی بەرخۆدان دەستیپێکرد.

 

لەم گردبوونەوەیەدا، مامۆستا شوانە بایز، بە نوێنەرایەتی دانیشتوانی هەرێمی سێوەیس و بناری قەندیل، وتارێکی پێشکەش کرد و تیشکی خستە سەر سیاسەتی قڕکردن کە دژی گەلی کورد بەڕێوەدەچێت.

 

"ڕۆژئاوا تەنها نییە و هێرش بۆ سەر ژنان و “منداڵان ئیدانە دەکەین"

لە وتارەکەدا بە توندی ئیدانەی بەئامانجگرتنی ژنان و منداڵان کرا لەلایەن دەوڵەتانی داگیرکەر و گروپە چەتەکانەوە. مامۆستا شوانە  وتی: ئێمە وەک خەڵکی بناری قەندیل، کە هەمیشە سەنگەری پێشەوەی بەرگری بووین لە خاک و کەرامەتی نەتەوەکەمان، لێرەوە هاوار دەکەین کە ڕۆژئاوا تەنها نییە. ئێمە ئامادەین بە گیان و خوێن پشتیوانی گەلی خۆمان بین و پیلانەکان پووچەڵ بکەینەوە.

 

"مێژوو سەلماندوویەتی دۆستمان نییە"

نوێنەری خەڵکی قەندیل لە بەشێکی دیکەی قسەکانیدا پەردەی لەسەر ڕووی دەسەڵاتدارانی ناوچەکە هەڵماڵی و وتی: کورد گەلێکی ئاشتیخواز بووە، بەڵام مێژوو سەلماندی کە دراوسێکانمان "عەرەب، تورک و فارس" سەرەڕای بانگەشەی برایەتی، درۆیان لەگەڵ کردین و خەنجەری خیانەتیان لێداین. بۆیە فێربووین جگە لە ئیرادەی خۆمان و چیا سەرکەشەکانمان، هیچ دۆست و پەنایەکمان نییە.

 

"پەیامی بەرخۆدان و نەترسان لە مەرگ"

بەشداربووان بە ورەیەکی بەرزەوە پەیامی ئەوەیان دا کە ترس لە فەرهەنگی ئەواندا بوونی نییە. لەوبارەیەوە جەخت کرایەوە: "با داگیرکەران باش بزانن، ڕۆڵەکانی قەندیل قەت لە مەرگ نەترساون، بەڵکو بە شانازییەوە پێشوازی لە هەر مەرگێک دەکەین کە لەپێناو پاراستنی نیشتمان و شکۆی نەتەوەکەماندا بێت.

 

گردبوونەوەکە بە بەرزکردنەوەی دروشمەکانی "بژی بەرخۆدانی ڕۆژئاوا"، "مەرگ بۆ داگیرکەران و خیانەتکاران" و سڵاو ناردن بۆ ڕێبەری گەلی کورد عەبدوڵا ئۆجالان کۆتایی پێهات.