ناوەندی هەواڵ

 

بوومەلەرزەکەی ٦ی شوبات حەلەبی هەژاند و لە گەڕەکی شێخ مەقسوود و ئەشرەفیە ٦ گیان لەدەستدان و ٤٣ برینداری لێکەوتەوە، ٢ هەزار و ٥٠٠ خێزانی ئەو کەسانەی لە عەفرینەوە هەڵاتوون بۆ حەلەب جارێکی دیکە بۆ ڕزگارکردنی گیانی خۆیان ڕوویان لە کەمپەکانی شەهبا و گوند و گەڕەکەکانی شارەوە کرد.

 

جگە لەوەش حکومەتی دیمەشق ڕێگری لەو هاوکارییە کرد کە لەلایەن ئیدارەی خۆسەری باکور و ڕۆژهەڵاتی سوریاوە بۆ حەلەب نێردراوە و ڕێگەی نەدا کەلوپەلی پێویست بۆ لێقەوماوانی بوومەلەرزە بچنە ناو ئەم ناوچەیە.

 

کارمەندانی شارەوانی لە کەمپی بەرخۆدان ڕایانگەیاند، دانیشتوانی حەلەب کە چوونەتە ناو کەمپەکە خەریکی ئامادەکردنی خێمە و پەناگەن، عەبدۆ یاسین ژنێکی ئاوارە و بەهۆی بوومەلەرزەکەی حەلەبەوە زیانی بەرکەوتووە، دەڵێت: لە کاتی بوومەلەرزەدا چووینە دەرەوە، بینایەک لەبەردەممان داڕما، هەر بۆیە چووینە کەمپەکان.

 

"دوای گەیشتنمان بە کەمپەکە، هەستمان بە ئاسوودەیی کرد"

دایکێکی تری دانیشتووی شاری حەلەب دەڵێت: "کاتێک خەوتبووین، ئەو بینایەی تێیدا دەمانەوە بە توندی دەلەرزی، ترسمان لێهات و ڕامانکرد، کاتێک گەیشتینە کەمپەکە ترسەکەمان نەما و هەستمان بە ئاسوودەیی کرد".

 

جودی منداڵێکی ئاوارە و سەبارەت بە بوومەلەرزەکەی حەلەب دەڵێت: کاتێک بوومەلەرزەکە ڕوویدا، ویستمان بچینە شوێنێکی ئارام، چونکە بوومەلەرزەکە بەردەوام بوو و ئەو بینایەی تێیدا بووین سەلامەت نەبوو، هەر لەبەر ئەم هۆکارە چووینە کەمپی بەرخۆدان لە شەهبا، زۆر دڵخۆشم کە گەیشتینە شەهبا.