حەسەکە

 

بە دروشمی "ئازادی بۆ ڕێبەر ئاپۆ و نەورۆزی یەکڕیزی دیموکراتیکی کورد"، ئاگری نەورۆزی حەسەکە لەلایەن گەلەکەیەوە هەڵگیرسا، دانیشتووانی حەسەکە بە هەموو پێکهاتەکانیانەوە، کورد، عەرەب، سریانی و ئەرمەنی، بە گیانی خەبات و تەبایی و یەکڕیزی پێشوازییان لە نەورۆزی ٢٠٢٦ کرد، سەرەڕای سیاسەتە گەندەڵەکان و ململانێ و سەرلێشێواویەکان، پێکهاتەکان ئاگری نەورۆزیان وەک پەیامی شکستی پلانەکانی شەڕی ناوخۆ پیشاندا.

 

بەهۆی بارودۆخی کەشوهەوا و باران بارین، ئەمڕۆ لە شارەکانی حەسەکە و قامیشلۆ و تیربەسپی جەژنی نەورۆز بەڕێوەدەچێت و ئاگری ئازادیش لە گەشەکردندایە.

 

بەتایبەت لە مەیدانی نەورۆزی حەسەکە، جۆش و خرۆش و وروژاندن و ڕۆحی نیشتمانپەروەرانەی منداڵان شایانی بینین بوو، هەروەها منداڵانی کورد بە ڕۆحێکی نیشتمانپەروەرانە گەورە دەبن و منداڵی خۆیان دەژین، چونکە لەم شۆڕشەی ڕۆژئاوای کوردستاندا دەرفەتی فێربوونی زمانی دایکی و مێژووی خۆیان لە خوێندنگەکاندا هەیە، ئاگاداربوون لە مێژوو و گرنگی نەورۆز، بە تامەزرۆییەوە چاوەڕێی جەژن دەکەن تا ئاگرەکەی داگیرسێنن، منداڵان هەست و خۆشەویستی و پەرۆشی خۆیان بۆ نەورۆز بۆ ئاژانسەکەمان دەربڕی.

 

”کەس ناتوانێت ڕێگری لە جۆش و خرۆشی نەورۆز بکات”

دڵڤین خەندی وتی: نەورۆز ڕۆژێکی نوێی ئازادی و ڕزگاربوونە لە نادادپەروەری بۆ مان، زۆر خۆشحاڵین کە جەژنی نەورۆزمان پیرۆز دەکەین، گرنگ نییە چی ڕووبدات هەموو ساڵێک ئەم جەژنە دەکەینەوە، ئەمڕۆ ئاڵای یەپەژەم هەڵگرت چونکە دەمانپارێزێت، من و هەڤاڵانم لە مەیدانی نەورۆز بە یەکپۆشی خۆمان ئامادەین و زۆر دڵخۆشین، بەم بۆنەیەوە دەمەوێت گۆرانییەکی شۆڕشگێڕانە بۆ شەڕڤانانی یەپەژە پێشکەش بکەم، بژی کورد و کوردستان.

 

”هەموو شتێک بە کوردی جوانە”

وارڤین محەمەد خۆشحاڵی خۆی دەربڕی و وتی: نەورۆز ڕۆژێکی پیرۆزە بۆ ئێمە، ئەگەر کەسیش لەگەڵمان نەیەت ئێمە دێین و ئاهەنگی ڕۆژەکەمان دەگێڕین، دایکانمان پێمان دەڵێن لە ڕابردوودا نەورۆز بە نهێنی بەڕێوە دەچوو، بەڵام ئەمڕۆ بەختەوەرین کە دەتوانین بە ئاسوودەیی جەژنی نەورۆز بکەین، سوپاسی هاوڕێیانمان دەکەین بۆ ماندووبوونیان و شەهیدان لەبیر ناکەین، ئێمە ئاگاداری داهاتوو دەبین، ئەمڕۆ جلی کوردیم لەبەر کرد بۆ ئەوەی بە هەموو جیهان بڵێم کە من کوردم و هەموو شتێک بە کوردی جوانە.

 

ئاهەنگی نەورۆز بە جۆش و خرۆشێکی زۆر و سەمای فۆلکلۆرەوە بەردەوام بوو.