ناوەندی هەواڵ

بەڕێوەبەرایەتی تەندروستی سلێمانی سەبارەت بە خۆربردن بڵاویكردووەتەوە، ئەو گەرمایەی لەگەڵ كەشوهەوای هاویندا پەیدا دەبێت، هەندێكجار دەبێتە هۆی ئەوەی لەش نەتوانێت پلەی گەرمی ڕێك بخات و كاتێك پلەی گەرمی لەش لە ٤٠ پلەی سەدی تێدەپەڕ دەێت، تێكچوونێك لە مێشكدا ڕوودەدات كە پلەی گەرمی لەشی پێ كۆنترۆڵ ناكرێت و كاریگەری لەسەر سیستمی سووڕی خوێن و مێشك دەبێت.

هۆكارەكانی خۆربردن بریتین لە، بەرزبوونەوەی پلەی گەرما و بەركەوتنی تیشكی ڕۆژ، كاركردن و زۆر مانەوە لەبەر خۆر.

 

نیشانەكانی ئەوەن كە كەسەكە ئارەق زۆر دەكاتەوە لە كەشی گەرمدا و دەموچاوی سور دەبێتەوە و پلەی گەرمی لەش بەرز دەبێتەوە، هەروەها هەناسەدانی خێرا دەبێت و ماسولكەكانی گرژ و سڕ دەبن، تووشی سەرگێژ خواردن و سەرئێشە و بێهۆشبوون و وڕێنەكردنیش دەبێت و هەست بە تینوێتی زۆر و سكچوون دەكات.

تەندروستی سلێمانی ئاماژەی بەوەشکردووە، ئەو كەسەی تووشی خۆربردن دەبێت، ئەگەر وەك پێویست هاوكاری نەكرێت، ئەوا دەبێتە هۆی وەستانی دڵ و مەترسی لەسەر ژیانی دروست دەبێت، پێویستە فریاگوزاری سەرەتایی بۆ بكرێت، كە بریتین لە گواستنەوەی بۆ شوێنێكی سێبەر و پاڵخستنی و بەرزكردنەوەی قاچەكانی و كردنەوەی جلەكانی و سڕینەوەی دەموچاوی و فێنككردنەوەی بە قوماشێكی تەڕ و شێدار.

سەبارەت بە ڕێكارەكانی خۆپاراستن ئەوە خراوەتەڕوو، ڕۆژانە ٦ بۆ ٨ پەرداخ ئاو بخورێتەوە و پۆشینی جلوبەرگی سپی و گونجاو و لە لۆكە دروستكراو، هەروەها دووركەوتنەوە لە بەركەوتنی درێژخایەنی خۆر و بەكارهێنانی كڵاو و چاویلكەی دژەخۆر.