ناوەندی هەواڵ

 

کانتۆنی عەفرین لە ڕۆژئاوای کوردستان لە ٢٠ی کانونی دووەمی ساڵی ٢٠١٨ ڕووبەڕووی هێرشی سوپای داگیرکەری تورک و گرووپە چەتەکانی بووەوە، دوای ٥٨ ڕۆژ بەرخۆدانی گەل لە شارەکەدا، بەهۆی پشتلێکردنی جیهان لە دەنگی گەلەکەی، لە ١٨ی ئاداری ٢٠١٨دا داگیرکرا و بە سیستماتیک سیاسەتی کۆمەڵکوژی، خۆکوشتن، گۆڕینی دیمۆگرافیا و کۆچبەرکردنی خەڵکەکەی، بە تورک کردن و قەڵاچۆ پێکردنی نەتەوە و ئاینە جیاوازەکانی شارەکە بەڕێوەبرا و ٥ ساڵە بەردەوامە.

 

سیاسەتی گۆڕینی دیمۆگرافیا لەلایەن چەتەکانی دەوڵەتی تورکیاوە بە قوڵی لەسەر عەفرین بەڕێوەدەچێت، لە شارەکەدا کە لانکەی پێکەوە ژیانی کورد، عەرەب، ئێزدی، ئاشوری و نەتەوە جیاوازەکانە، پاش داگیرکاری زیاتر لە ٣٥٠ هەزار هاوڵاتی شارەکە قەڵاچۆ پێکراون، ٢٢ گەڕەکی زیادەڕۆ دروستکراوە و زیاتر لە ٥٠٠ هەزار کەسی تورکمان و عەرەبی فەلەستینیان هاوردە کردووە و نیشتەجێیان کردوون، هەروەها ٦٦٣ کەس کە ٩٦ کەسیان ژنە لەژێر ئەشکەنجەی چەتەکاندا گیانیان لەدەستداوە، زیاتر لە هەشت هەزار  و ٦٤٤ کەسیش ڕفێنراون.

 

لەناوبردنی ژینگەی عەفرین تا ئیستا بەردەوامە

لە ماوەی پێنج ساڵدا، دەوڵەتی داگیرکەری تورک و چەتەکانی، سروشت و ژینگەی عەفرینیان بەرەو لەناوبردن بردووە و زیاتر لە ٣٦٧ هەزار داریان بڕیوەتەوە، هەروەها زیاتر لە ١٣ هەزار و ٥٠٠ دار و زیاتر لە ١٢ هەزار هێکتار ڕەز و باخ و دارستانیان سووتاندووە.

 

لە نوێترین هەوڵدا، چەتەکانی جەیش ئەلشەرقیە ٢٠٠ داری زەیتونیان لە گوندی فریری شارۆچکەی جندرێس لە کانتۆنی عەفرین، بە مەبەستی دروستکردنی ئۆردوگا و نیشتەجێکردنی هاوڵاتییەکانی خۆیان بڕیوەتەوە، جگە لەوەش چەتەکان ٣٠٠ داری زەیتونی گوندی سدیگانکی جندرێسیان بڕیوەتەوە، کە سەر بە یەکێتی جووتیاران بوو.