گەرمیان

 

ئەمڕۆ لە پارکی مەشخەڵان لە شارۆچکەی کەلاری ناوەندی ئیدارەی گەرمیان، ناوەندی هاوبەشی ڕێکخراوەکانی ژنان و چالاکوانانی گەرمیان، گردبوونەوەیەکیان ئەنجامدا و لە کۆنگرەیەکى ڕۆژنامەنووسیدا ڕاگەیەنراوێکیان بڵاوکردەوە.

 

شەیما جەمال، بەناوی ڕێکخراوەکانی ژنان لە کۆنگرەکەدا بەیاننامەیەکی هاوبەشی خوێندەوە و ئاماژەی بەوەدا کە لە جیهاندا لەم ڕۆژەدا چالاکی جۆراوجۆر بۆ بەرەنگاربوونەوەی توندوتیژی بەڕێوەدەچێت، ئێمەش بەردەوامی کاری خۆمان ڕادەگەیەنین و دووپاتی دەكەينەوە كە داكۆكيكارى مافەكانى ژنان بين و كاردەكەين بۆ بەدیهێنانی كوردستانێكى خاڵی لە توندوتیژی و پێشێلكارى مافی ژنان.

 

"ڕۆژانە تيرۆركردن، كوشتن، سوكايەتى و توندوتيژى دژ بە ژنان بەردەوامە، ئەمەش هەڕەشەيەكە نەك تەنها لە سەر ژنان، بەڵكو لەسەر ئاسايش و ئارامى كۆمەڵگاکەمان، بەردەوامى ئەم كارە ئەوە دەسەلمێنێت كە ئێمە لە هەرێمێكدا دەژين تاكو ئێستا مافى ژنان زامن نەکراوە و لە بەرژەوەندی پاراستنى ژناندا نییە".

 

شەیما باسی لەوەکرد کە پێویستە میکانیزمی خێرا و نەخشە ڕێگايەكى ورد بۆ بەرگرتن لە توندوتيژيەكان و پێشلكاريەكان لەم هەرێمەدا بەرامبەر مرۆڤەكان بەگشتى و ژنان بە تايبەت بگیرێتە بەر بۆ پاراستنى بەها مرۆڤايەتيیەكان و بەگژداچوونەوەى توندوتيژى.

 

لە بەیاننامەکەدا بە حەوت خاڵ داواکاریی خۆیان خستەڕوو:  

١-ياسا سەروەر بێت و داواكارى گشتى ڕۆڵى بەرپرسيارێتى خۆي ببينێت لەو تاوانانەى بەرامبەر ژنان ئەنجام دەدرێت .

٢-چارەسەركردنى قەيرانى ئابوری و بارى گوزەرانى خەڵك كە هۆكارێكە بۆ زيادبوونى كێشە كۆمەڵايەتيەكان .

٣-تاوانباران بەپێی ياسا سزا بدرێن و ياسا دوربێت لەدەستێوەردان.

 

٤-ئەو ياسايانەى كە لە پەرلەمان دەرچوون ئەگەر پێويست بوو هەموار بكرێتەوە و ياسای نوێ دەربكرێت بۆ ڕێگرىكردن لە توندوتيژى، پێويستە ليژنەى ئافرەتان و ليژنە پەيوەندىدارەكان ڕۆڵی خۆيان ببينن.

٥-ئەركى ڕێكخراوەكانى ژنان و ئافرەتانە كە ڕۆڵی خۆيان ببينن و زياتر كاربكەن بۆ وشيار كردنەوەى تاكەكانى كۆمەڵگا.

 

٦_ دۆخی پەناگەی داڵدەدانی ژنانی ھەڕەشەلێکراوی گەرمیان زۆر خراپە، لە رووی دابینکردنی پێداویستی و خزمەتگوزارییەکانەوە، بەشێوەیەک کە بە کۆمەک و ھاوکاری خێرخوازان بەڕێوەدەچێت. دەبێت دۆخی شەڵتەرەکە باش بکرێت و کەموکورتییەکانی دابین بکرێت و خزمەتگوزارییەکانی کارا بکرێتەوە.

 

ت.پ