ناوەندی هەواڵ

 

ماوەی ٢١ ڕۆژە شاری کۆبانێ لە ڕۆژئاوای کوردستان لە هەموو لایەکەوە گەمارۆیەکی توندی گرتووە، کە لەلایەن جیهادیەکانی هەتەشە و چەتەکانی داگیرکەری تورکیاوە سەپێنراوە، ئەمەش بووەتە هۆی ئەوەی کە بە تەواوی داببڕێت و پێداویستییەکانی خۆراک لە بازاڕەکاندا لە تەواوبوون، لە ماوەی چەند هەفتەی ڕابردوودا تەنها سێ باری سنووردار لە ڕێگەی نەتەوە یەکگرتووەکانەوە هاتوونەتە ناوەوە، کە لە کەلوپەلی پاککەرەوە و بەتانی پێکهاتوون، بەبێ خواردن و دەرمان.

 

خزمەتگوزارییە سەرەتاییەکان بە تەواوی داڕماون، لە ١٨ی کانوونی دووەمەوە کارەبا پچڕاوە، نەخۆشخانەکانیش بە مۆلیدەکان کاردەکەن کە بەهۆی کەمی سووتەمەنیەوە لە لێواری لەکارکەوتندان، هەروەها ئاوی فورات وەستاوە و دانیشتووانەکەی ناچار کردووە پشت بە ژمارەیەکی سنووردار لە بیرەکان ببەستن، ئەمەش بووەتە هۆی بڵاوبوونەوەی نەخۆشییەکان.

 

دەوترێت دەرمانەکان نزیکن لە نەمان، بەتایبەتی بۆ تووشبووانی شێرپەنجە و شەکرە و بەرزی فشاری خوێن، نەخۆشخانەکان شیر و ئۆکسجینیان بۆ منداڵان تەواو بووە و ژنانی دووگیان و نەخۆشەکان بەدەست کەمی پێداویستی پزیشکییەوە دەناڵێنن، زیاتر لە ٢٠٠ هەزار کەس، جگە لە نزیکەی ٤٠٠ هەزار کۆچبەر، لە ناو شارەکەدا لە دۆخێکی ناخۆشدا دەژین.

 

جگە لەوەش گەمارۆی ئەلیکترۆنی سەپێنراوە و ئینتەرنێت و پەیوەندییەکان پچڕاوە، ئەمەش زیاتر دانیشتووانی ناوچەکانی دیکەی لە کەسوکارەکانیان دابڕاندووە و خێزانەکانیشی خستۆتە حاڵەتێکی دڵەڕاوکێی زۆرەوە، سەرەڕای ڕێککەوتنێک کە لە ٢٩ی کانوونی دووەم لە نێوان هێزەکانی سووریای دیموکرات و حکومەتی کاتی سووریادا ئەنجامدرا و تێیدا مەرجی کشانەوەی توخمە چەکدارەکانی بۆ دووری ١٠ کیلۆمەتر دیاریکرابوو، بەڵام ڕێگاکانی بەرەو کۆبانێ بە داخراویی ماونەتەوە.