ناوەندی هەواڵ

 

ناوەندی لێکۆڵینەوەی ژنۆلۆژی لە شاری تەبقا بە هاوکاری بەڕێوەبەرایەتی ژینگە، بۆ ناگیهان ئاکارسەل، ئەندامی ئەکادیمیای ژنۆلۆژی و ڕۆژنامەنووس کە لە شاری سلێمانی تیرۆرکرا، سەدان نەمامیان لە ڕێگای نەخۆشخانەی نەتەوەیی چاند.

 

ئیدارەی مەدەنی دیموکراتیکی تەبقا، نوێنەرانی مەکتەبی کۆمەڵگەی ژنانی زینوبیا، سەرۆک عەشیرەتەکان، یەکێتی ژنانی گەنج و ئەندامانی بزوتنەوەی لاوانی شۆڕشگێڕی سوریا و چەندین کەسی دیکە بەشدارییان لە چاندنی نەمامەکاندا کرد.

 

ماریا ئیسماعیل، ناوەندی لێکۆڵینەوەی ژنۆلۆژی لە تەبقا، وتارێکی پێشکەشکرد و وتی: کاتێک مرۆڤ لە سروشت دوور بێت، لە خۆی و ژن و کۆمەڵگەش دوور دەبێتەوە، ژنۆلۆژی گرنگی بە سروشت دەدات و هۆشیاری پاراستنی سروشت بڵاودەکاتەوە. بە کۆبوونەوەی ئەمڕۆمان لێرە یەکڕیزیمان بەهێزتر دەبێت. هیوا و ژیان بۆ کۆمەڵگەی دیموکراتیک دەچێنین.

 

هودا ئەل عوان، هاوسەرۆکی ئەنجومەنی یاسادانانی تەبقا، وتی: لە هەموو جیهاندا ڕۆژانە ژمارەیەکی زۆر لە ژنان دەکوژرێن. تاوانەکان دژ بە ژنان لە زیادبووندان. ئەو ژنە تێکۆشەرانەی کە لە شۆڕشی ڕۆژئاوادا بەشدار بوون، گرنگییەکی زۆریان بە پەیوەندی نێوان ڕزگاری خاک و ڕزگاری ژنان داوە، لێرەدا پرۆسەیەکی نوێ لە مێژووی ژناندا دەستیپێکرد، بوون بە شەڕڤان، شۆڕشگێڕ، سیاسەتمەدار و پێشەنگ.