سلێمانی

 

پاشنیوەڕۆی ئەمڕۆ، لە هۆڵی پەیمانگای کوردی بۆ هەڵبژاردن لە شاری سلێمانی، بە دەستپێشخەری هاوبەندی کۆمەڵگەی مەدەنی عێراق، بە هەماهەنگی فیدراسیۆنی ڕێکخراوەکانی کۆمەڵی مەدەنی و ڕێکخراوە نێونەتەوەیی، بیانی و نێودەوڵەتییەکان، لە کۆنگرەیەکی ڕۆژنامەنووسیدا داوا کرا ئۆپەراسیۆنی "چنگی – قفڵ" بووەستێنن.

 

 

بەیاننامەی هاوبەشی ڕێکخراوەکان لەلایەن جەبار عەزیز خویندرایەوە تێیدا هاتووە، لە ١٧ی نیساندا، هێزەکانی سوپای تورکیا ئۆپەراسیۆنێکی سەربازیان لە ناوچەکانی ئاڤاشین، زاپ و مەتینا لە قەزای ئامێدی لە کوردستانی عێراق ڕاگەیاند، لە ئێستادا هەلیکۆپتەرەکان دەفڕن بەسەر ناوچەکانی دێرەلوك و شیلادزێ و بۆمببارانی ناوچە شاخاویەکان دەکەن. چەندەها ساڵە هاوڵاتیانی ناوچەکانی سنورەکانی باکوری کوردستانی عێراق ترسیان هەیە لە هێرشی سەربازی سوپای تورکیا، پێش ئۆپەراسیۆنەکە تورکیا زیاد لە ٥٠ جار گوندەکانی شیلادزێ، دێرەلوك و کانی ماسی بۆمبباران کردووە. هەروەها چەندەها سەربازی تورکیا بە هەلیکۆپتەر نێردراون بۆ ناوچە شاخاویەکانی نێروە و ڕێکان. لەم چەند ساڵەی دواییدا دانیشتوانی ناوچەکە ڕووبەڕووی چەندەها بۆمبباران کردن بوونەتەوە کە بووەتە مایەی زەرەر و زیان، برینداربوون و مردن و هەرگیزیش قەرەبوو نەکراونەتەوە.

 

"کاتی ئەوەیە جەنگ بوەستێنرێت"

لە بەیاننامەکەدا باس لەوەکراوە بەهۆی زیانی هێرشەکانی دەوڵەتی تورکیاوە کە دانیشتوانی ئەو ناوچانە ناچاردەکرێن شوێنەکانیان جێبهێڵن، "تادێت باری ئارامی و سەقامگیری گوندەکان خراپتر دەبن و ئەم دۆخەش وایکردووە مەحاڵبێت کە ژیانێکی شایستەیان هەبێت. سەرەڕای ئەمەش چەندین خێزان لە گوندەکان ماونەتەوە سەرەڕای ترس و سەختی گەیشتنیان بە خاکەکانیان بە مەبەستی کشتوکاڵکردن، بەردەوامیش فشارێکی زۆریان لەسەرە بەهۆی بۆمبباران کردنەوە".

 

سەرەڕای ئیدانەکردن، ڕێکخراوەکان داوادەکەن کە گیانی هاوڵاتیان پارێزراو بێت و کۆمەڵگەی مەدەنی چاودێری ئەو دۆخە بکەن کە لە سنورەکانی کوردستانی عێراق دەگوزەرێت، "داوا لە دەوڵەتی تورکیا دەکەین کە ڕاستەخۆ بۆمبباران کردن بووەستێنێت و حکومەتی عێراقی و حکومەتی هەرێمی کوردستان ڕێکاری کاریگەر بگرێتەبەر بۆ زامنکردنی پارێزراوی گیانی هاوڵاتیانیان"، لە کۆتایشدا جەختیان لەوەکردەوە "لە ئۆکرانیاوە تا ئەفغانستان، یەمەن تا عێراق و چەندەها وڵاتی دیکەش، کاتی ئەوەیە جەنگ بووەستێندرێت!".

 

هاوکات بەیاننامەکە بە هەردوو زمانی عەرەبی و ئینگلیزی خوێندرایەوە.

ڕێکخراوە نێونەتەوەیی، بیانی و نێودەوڵەتییە بەشداربووەکان:

کەمپەینی کۆتاییهێنان بە بۆردوومانەکانی سەر سنور

تیمەکانی بنیادنەرەوەی ئاشتی کۆمەڵگە- سی پی تی

دەستپێشخەری هاوبەندی کۆمەڵگەی مەدەنی عێراقی

دامەزراوەی کۆدی پەمەیی ئەمریکی

ڕێکخراوی پردێک بەرەو-ی ئیتاڵی

دامەزراوەی نێودەوڵەتی نۆڤاکت بۆ کاری ناتوندوتیژی

ژماردنی قوربانیانی جەنگی عێراق

فیدراسیۆنی ڕێکخراوەکانی کۆمەڵگەی مەدەنی

وەرزش دژی توندوتیژی لە عێراق

ڕێکخراوی هاوسۆزی بۆ کوردستان

کۆڕبەندی کۆمەڵایەتی عێراق

پاراستنی ڕوباری دیجلە