ناوەندی هەواڵ

 

بە پێی ڕاپۆرتی گروپی چالاکوانانی مافی مرۆڤی ئێران، لە مانگی تەمموزی ئەمساڵدا، لانیکەم ٦٩ کەس سزای سێدارەدانیان بەسەردا سەپێنراوە، زیاتر لە ٪٧٥ی ئەو لەسێدارەدانانە لەلایەن حکومەت و دەزگای دادوەرییەوە ئاگادار نەکراونەتەوە و ڕێکخراوەکانی مافی مرۆڤ ئەو دۆسیانە بە لەسێدارەدانی نهێنی ناودەبەن.

 

لە ڕاپۆرتەدا هاتووە، لە مانگی ڕابردوودا، پێنج زیندانی لە زیندانەکانی قەزوین، کرمان و کەهنوج، زیندانییەک لە زیندانی زابول، سێ زیندانی لە شیراز و هەمەدان، دوو زیندانی لە زیندانی ڤاکیل ئاباد لە مەشهەد، دوو زیندانی لە ئەراک، سزای سێدارەیان بەسەردا سەپێنراوە، زیندانییەک لە زیندانی بیرجەند، چوار زیندانی لە زیندانی زاهیدان، دوو زیندانی لە زیندانی هەمەدان و زیندانییەک لە زیندانی کەهنوج، دوو پیاو و ژنێک لە تاران لە سێدارە دراون.

 

جێی ئاماژەیە، دوای شۆڕشی ژن، ژیان، ئازادی و سەرەڕای هۆشداریی ڕێکخراوی لێبوردنی نێودەوڵەتی سەبارەت بە پێشێلکردنی مافەکانی مرۆڤ لە ئێران، لەسێدارەدانی زیندانیان لە ئێران بە بیانووی بازرگانیکردن بە ماددە هۆشبەرەکان، شەڕ و کوشتن توندتر بووە، بەپێی ئەو ئامارانەی بڵاویش کراونەتەوە لە ماوەی مانگی ڕابردوودا، لانیکەم ٧٣ زیندانی بەلوچ کە چواریان ژن بوون، لە زیندانەکانی ئێران لەسێدارە دراون.

 

بەپێی ئاماری ساڵانە و لە درێژەی سەرکوتکردنی سیستماتیکی گەلی بەلووچ، لە ماوەی ساڵێکدا، لە ئابی ساڵی پارەوە تا ئەمساڵ، لانیکەم ١٧٤ هاووڵاتی بەلووچ بە بیانووی درۆ و ناڕاست لە سێدارە دراون.