ژنان لە شاری وان و ئامەد و ئیستەنبوڵ بۆ ژینا ئەمینی گردبوونەوە
ژنان لە شاری وان، ئامەد و ئیستەنبوڵ بۆ ئیدانەی کوشتنی ژینا ئەمینی لە تارانی پایتەختی ئێران گردبوونەوە و تیشکیان خستەسەر مافی بەرگریکردن لە خۆیان بەرامبەر توندوتیژیی دەوڵەت-پیاو.
ناوەندی هەواڵ
سەکۆی ژنانی ئامەد لە دیجلە، لە شاری ئامەدی باکووری کوردستان لەبارەی کوشتنی ژینا ئەمینی تەمەن ٢٢ ساڵ کە لەلایەن پۆلیسی ڕەوشتی ئێرانەوە لێیدرا و ئەشکەنجە درابوو، بەیاننامەیەکیان بڵاوکردەوە و تێیدا هەریەک لە پێکهاتەکانی پلاتفۆرمەکە و گوڵستان کلیچ کۆچیگیت، پەرلەمانتاری هەدەپە لە مووش بەشدارییان کرد، پانکارتی "ئێمە ژنین، کوردین بەرخۆدان دەکەین، ئێمە لە ڕاپەڕینداین، تەسلیم نابین" بەرز کرایەوە، ژنان بە زمانەکانی کوردی و تورکی و فارسی دروشمی "نا بۆ جینۆسایدی ژنان" دەوترایەوە.
"سڵاو لەو ژنانە دەکەین کە لە ئێران بەرخۆدان دەکەن"
گوڵستان کلیچ کۆچیگیت، پەرلەمانتاری هەدەپە لە شاری مووش وتارێکی پێشکەشکرد و وتی: ئێمە بەهۆی زەردەخەنەمانەوە، بەهۆی تەنوورە کورتەکانمانەوە دەکوژرێین، لە هەموو جیهاندا ژنان دەکوژرێن. لە ئێران ژن دەکوژرێت، ژن لەم وڵاتە بەهۆی سیاسەتەکانی ئاکەپە دەکوژرێت. ئێمە ئەم ئەقڵیەتە لە کوشتنی ئەکین وان، دایکی تەیبەت و ئیپێک ئەرێ دەناسین، وه‌زاره‌تی ئێران ڕاگه‌یه‌نراوێكی بڵاوكرده‌وه و ڕایگه‌یاند، "پۆلیسی ئێمه نامووسی خۆیان پاراستووه" ئێمە دەڵێین کۆتایی بە ناموستان بێت، ئێمە وەک ژنانی کورد سڵاو لەو ژنانە دەکەین کە لە ئێران بەرخۆدان دەکەن، پێمان وایە جیهانێکی تر بوونی نییە بۆیە ئەم جیهانە بنیاد دەنێین، بژی هاوکاری ژنان، بمرن فاشیزم و زاڵبوونی پیاوان.
هاوکات بەیاننامەی هاوبەش لەلایەن قیمەت یەڵدزەوە خوێندرایەوە و تێیدا هاتووە، "ژنان لە لایەکەوە دژی سیستمی پیاوسالاری شەڕ دەکەن، لە لایەکی دیکەشەوە لە ئەنجامی شەڕە پیسەکانی هێزە هەژموونەکان دژی کۆچ و هەژاری و کۆمەڵکوژی و کوشتار دەجەنگن. لە جیهاندا گرنگترین هۆکاری توندوتیژی دژ بە ژنان شەڕ و خودی پێشهاتەکانە. دیسان لە تارانی پایتەختی ئێران ژنێک بە ناوی مەهسا ئەمینی لەلایەن پۆلیسی ڕەوشتی ئێرانەوە دەستبەسەر کرا و بەهۆی ئەشکەنجەوە گیانی لەدەستداوە. ژنان ڕۆژانە ڕووبەڕووی سزای توند دەبنەوە، چونکە دژایەتی ئەم بیرکردنەوە و سەپاندنی باڵاپۆش و قەدەغەکردنی جلوبەرگ دەکەنەوە. لە ئێران، ئەرمینیا، سوریا، ئۆکرانیا، ئەفغانستان، پاکستان، عێراق و جیهاندا، مردن و توندوتیژی، هەژاری، کۆچ و ئازار بۆ ژنان بە ڕەوا دادەنرێت. هێرشەکان لە دژی مافی ژنان و ئازادی ژنان زۆرن. پێویستە ژنان مافی بەرگریکردن لە خۆیان لە بەرامبەر ئەم کردەوانە بەکاربهێنن.
ژنانی خوێندکار لە ئیستەنبوڵ ڕێپێوانیان کرد
هاوکات ئەنجومەنی خوێندکارانی دیموکراتیک لە بەردەم میترۆی بۆمۆنتی لە عوسمانبەی بەرەو شەقامی فەریکۆ دژی کوشتنی ژینا ئەمینی لە تاران ڕێپێوانیان کرد، خوێندکاران پانکارتی "قژی ژنان لە ملی تۆدا دەبەسترێت"یان بەرز کردەوە و دروشمی "ژنە کوژراوەکان یاخیبوونی ئێمەن"یان دەوتەوە.
نازگول چەمور، ئەندامی ئەنجومەنەکە وتارێکی پێشکەشکرد و وتی: کوشتنی مەهسا ئەمینیی ٢٢ ساڵ نموونەیەکی کۆنکرێتی ئەو عەقڵیەتە قەدەغەکار و ستەمکارەیە کە ٤٣ ساڵە بەردەوامە. لە کەسایەتی مەهسا ئەمینیدا هەر ژنێک بکوژرێت یاخیبوونی ئێمە دەبێت. ئێمە کەسانێک دەناسین کە ئیرادە و شوناسی ئێمە ناناسن و هەموو کۆمەڵگە لە کەسایەتیماندا دەقۆزنەوە، کۆمەڵگە بەبێ ئازادی ژنان ناتوانێت ئازاد بێت.
ژنانی شاری وان: ژن ناترسن
بزووتنەوەی ژنانی ئازاد-تەژەئە، پارتی هەرێمە دیموکراتییەکان-دەبەپە، ئەنجومەنی ژنانی هەدەپە، کۆمەڵەی ژنانی ستار لە شاری وان بەیاننامەیەکی هاوبەشیان لەلایەن خانم ئاککوش، هاوسەرۆکی هەدەپەی ناحیەی توشبە خوێندرایەوە و تێیدا وتی: دەربڕینی نەبوونی ئیرادە چەمکێکە کە قژی ژنان وەک شەرەف و ئەخلاق دەبینێت، ئێمه‌ی ژنان به‌و ده‌سه‌ڵاتی مه‌لایانە ده‌ڵێین، كه هه‌وڵده‌دات ده‌سه‌ڵاتی دیكتاتۆری خۆی بپارێزێت؛ ئێمە عەقڵیەتی پیسی ئێوە قبوڵ ناکەین، سوێندمان خواردووە کە لە هەموو جیهاندا دژی ئەم عەقڵیەتە فاشیستییە تێکۆشان بکەین و سەرکەوین، بۆ ڕێکخستنی خەباتێکی ڕێکخراو دژی سیستەمی باڵادەستی پیاو. وەک ژن دەبێت داوا لە ڕژێمی مۆڵا بکەین کە لێپرسینەوە لە هەموو کۆمەڵکوژی و کوشتنی ژنان بکات.
چالاکییەکان بە وتنەوەی دروشمی "ژن ژیان ئازادی" و "ژن ناترسن، داوای لێپرسینەوە دەکەن" کۆتایی هات و دواتر ژنەکان بە ڕێپێوانێکی بێدەنگ کۆتاییان بە چالاکییەکەیان هێنا.