ناوەندی هەواڵ

 

کامپی هۆل کە دەکەوێتە شاری حەسەکە لە باکوورو ڕۆژهەڵاتی سووریا، مەترسیدارترین کامپی جیهانە و بەگوێرەی دوایین ئاماری خۆبەڕیوەبەری، ٤٢ هەزار و ٧٨١ ئەندامی خێزانەکانی داعش لەو کامپە دەژین، لەوانەش ١٩ هەزار و ٥٣٠ کەسیان عێراقین و ١٦ هەزار و ٧٧٩ کەسیان سوورین و شەش هەزار و ٤٦١ـیان بیانین، هەروەها ناسنامەی ١١ هەزار کەسیان نادیارە و نەزانراوە.

 

نووسینگەی ڕاگەیاندنی ڕاوێژکاری ئاسایشی نەتەوەیی عێراق لە ڕاگەیەندراوێکدا سەبارەت بە گەڕانەوەی ئاوارەکانی کامپی هۆڵ ڕایگەیاند، لیژنەی باڵای سەرپەرشتیکردنی دۆسێيەى کامپی ھۆڵ بە ئامادەبوونی وەزیری کۆچ و کۆچبەران و ڕاوێژکاری ئاسایشی نەتەوەیی عێراق کۆبوەتەوە، دواین ڕێکار و ھەنگاوەکانیان تاوتوێکردووە تایبەت بە گەڕاندنەوەی سەرجەم خێزان و کەسوکاری داعشە عیراقییەکان کە لە کامپی ھۆڵ لە ڕۆژئاوای کوردستان نیشتەجێن.

 

ڕاشیگەیاندووە، لە کۆبونەوەکەدا بڕیاردراوە پەلە بکرێت لە جێبەجێکردنی تەواوی ڕێوشوێن و ڕێکارەکانی تایبەت بە گەڕاندنەوەی سەرجەم خێزانە عێراقییەکانی کامپی ھۆڵ بۆئەوەی لە کامپی جەدعە لە سنووری پارێزگای نەینەوا نیشتەجێ بكرێن بە مەبەستی تێکەڵبوونەوەیان بە کۆمەڵگە.