دهۆک

 

لە بەرامبەر هێرشەکانی سەر گەلی کورد ئەوەی پیویستە یەکڕیزی نەتەوەیی و ئیرادەی گەلە، چونکە دوژمن بە یەکڕیزی نەتەوەیی گەلی کورد پلانەکانی پوچەڵ دەبێتەوەو ناتوانێت قوەک ڕابردوو سوود لە پەرتەوەزایی ناوماڵی کورد ببینێت، ئەم یەکڕیزییە لەڕیی هۆشیارییەوە زیاتر دەبێت و هەمیشە گەلی کورد هەوڵیداوە هۆشیاربێت بەرامبەر هەر پلانێک و لە شەڕی تایبەت و ڕاستەوخۆ خۆی پاراستووە، هۆشیاری و خۆپاراستن بەدرێژایی مێژوو بنەما بووە لای گەلی کوردو تا ئەمڕۆ هەر تاکێک خۆی بە بەرپرسیار زانیوە بۆ پاراستنی خاک و نەتەوە، هەربۆیە ئەم یەکڕیزییەی دروست بووە لە ئەنجامی بەرخۆدان و خۆپاراستن هاتووەتە پێشەوە، هەروەک لەکاتی هیرشەکانی هەتەشە لە مانگی کانوونی دووەمی ئەمساڵ بۆ سەر ڕۆژئاوای کوردستان و شارە کوردییەکان بینیمان کە چۆن گەلی کورد لەهەر چوالای کوردستان و جیهان بەدەنگ هاتن و بوونە قەڵغان لە بەرامبەر هەڕەشەو هیرشەکاندا.

 

ئیرادەی گەنجان درێژەپێدەری خەباتی نیشتمانییە

دێرین خدر، چالاکوانی کۆمەڵگەی مەدەنی و مافەکانی ژنان سەبارەت بە پیویستی یەکڕیزی نەتەوەیی قسەی بۆ ئاژانسەکەمان کردو تیشکی خستە سەر زیندوێتی هەستی نەتەوەیی لای نەوەی نوێ و وتی: ئەو یەکدەنگییەی شەقام لە کاتی هێرشەکان بۆ سەر ڕۆژئاوای کوردستان بینرا، سەلمێنەری ئەو ڕاستییەیە کە نیشتمانپەروەری لای گەنجانی ئەمڕۆ، هاوشانی خەباتی چیا لە سەردەمی باوباپیرانمان بەهێز و زیندووە. ئەم گەنجانە پارێزەری ئەو میراتە و خوێنی شەهیدانن کە بەرهەمەکەی دەستکەوتەکانی ئەمڕۆی کوردستانە.

 

ستراتیژیی یەکڕیزیی بەرامبەر گەمارۆ هەرێمییەکان

دێرین خدر ئاماژەی بەوە کرد کە کوردستان لە ژینگەیەکی جیوپۆلیتیکی ئاڵۆزدایە و هەمیشە لەلایەن نەیارانەوە گەمارۆ دراوە، وتی: نەیاران هەمیشە لە هەوڵی دروستکردنی درز و دووبەرەکین لە ناوخۆی کورددا. لەم قۆناغەدا، یەکڕیزیی ناوخۆیی تەنها بژاردەی ستراتیژییە بۆ پاراستنی قەوارەی هەرێم و پووچەڵکردنەوەی دەستێوەردانە دەرەکییەکان. یەکدەنگیی کورد وەک دیوارێکی کۆنکرێتی وایە بەرامبەر هەر هەڕەشەیەک کە بیەوێت ئیرادەمان بشکێنێت.

 

ڕۆڵی ژنان و چالاکوانان لە دروستکردنی فشاری مەدەنی

وەک ژنە چالاکوانێک، دێرین خدر پەیوەندی نێوان ئاشتەوایی خێزانی و سیاسی ڕوون دەکاتەوە و دەڵێت: "ئێمە وەک چالاکوانی مافەکانی ژنان و منداڵان، بڕوامان وایە یەکڕیزیی نەتەوەیی لە خێزانەوە دەست پێدەکات. کارکردن لەسەر ئاشتەوایی کۆمەڵایەتی، بناغەیەکی پتەوە بۆ گەیشتن بە یەکڕیزییەکی سیاسی سەرتاسەری. ئێمە لە ڕێگەی چالاکییە مەدەنییەکان و کۆبوونەوە ئۆنلاینەکانەوە، بەردەوام فشاری مەدەنی دەخەینە سەر ناوەندە سیاسییەکان تا یەکڕیزی بکەنە کار لەپێشینەی خۆیان.

 

هۆشیاریی کۆمەڵگە؛ دادوەری داهاتوو

لە کۆتایی قسەکانیدا دێرین خدر پەیامێکی ئاراستەی لایەنەکان کردو وتی: لە کاتێکدا نائومێدی باڵی بەسەر بەشێک لە گەنجاندا کێشابوو، بەڵام هەڵوێستە نەتەوەییەکان نیشانیان دا کە گەنجان خاوەن ئیرادەیەکی پۆڵایینن،  ئەگەر کۆمەڵگەیەکی هۆشیارمان هەبێت، هیچ لایەنێک ناتوانێت یاری بە چارەنووسمانەوە بکات،. گەلی هۆشیار لە داهاتوودا دەبێتە دادوەر و لێپرسینەوە لە هەر کەس و لایەنێک دەکات کە بەرژەوەندییە نەتەوەییەکان دەخاتە مەترسییەوە.