سلێمانی

 

ئێوارەی ئەمڕۆ لە تەلاری هونەر لە شاری سلێمانی، بەبۆنەی رۆژی ٢٥ی نۆڤەمبەر و هەڵمەتی بەرەنگاربونەوەی توندوتیژی دژی ژنان، ژمارەیەک پیاوی ئازادییخواز لە شاری سلێمانی، لە دژی توندووتیژییەکانی بەرامبەر ژنان بەیاننامەیەکیان خوێندەوە.

 

نەورۆز فازڵ، بەیاننامەی پیاوانی خوێندەوە و تێیدا هاتبوو، دەنگی ئێمەی پیاوان هاوارە بەڕووی ئەو ناهەقی و ستەمەی لە کەسێتی پیاوێتیدا بەرامبەر ژنان دەکرێت، ئەگەر ئێمەی پیاوان لە ئازادیی و دادپەروەریی و ژیانێکی شکۆمەندانە دەگەڕێین، ئەوا پێویستە هەرچی زووە کۆتایی بە سوکایەتی و هێرش و توندوتیژی سەر ژنان بهێنین، با هیچ پیاوێک بە پیاوێتی خۆی نەنازێت، چونکە دوژمنان و داگیرکەران بەکرێگیراوانی ناوخۆ و بازرگانانی دینیش، لەڕێگای ئەمجۆرە پیاوێتیەوە درێژە بە داگیرکاریی و خیانەت و ستەم و چەوساندنەوەی سەر کۆمەڵگەکەمان دەدەن.

 

ئەوەش هاتبوو تێیدا، جێگەی خۆیەتی ئاوڕ لە ڕۆڵی پێشەنگایەتی ژنانی ڕۆژهەڵاتی کوردستان و ئێران بدەینەوە، کە چۆن بەرامبەر ستەمکارترین ڕژێم بوونەتە وزە و دینامیک و هێز دەبەخشن بەپیاوان و سەرجەم پێکهاتە و نەتەوە و چینوتوێژەکانی کۆمەڵگای کوردستان و ئێران تەنانەت جیهانیش ئەوە ڕۆح و پێشەنگایەتی ژنانی ڕۆژهەڵاتە کە بەدروشم و چالاکی و ڕەنگی ژنانەی خۆیان مۆرکی شۆڕشی زیهنی و ویژدانی و دیموکراسیان لەتەواوی گۆڕەپان و ئەم قۆناغە داوە.

 

ئاماژەی بەوەشدا، پێویستە دەستبەرداری زیهنییەتی پیاوێتی ببین و وەکو باوکی شەهید محەمەد حەسەن لە ڕۆژهەڵاتی کوردستان فەرمووی، دەبێت لەمەولا زۆر ژن بین، تاوەکو ڕێنیشاندەری ئازادیی و سەرکەوتنی گەلەکەمان بین.

 

پیاوانی بەشداربوو بە تێکڕا دروشمی "ژن، ژیان ئازادی"یان وتەوە و کۆتاییان بە چالاکییەکەیان هێنا.