ناوەندی هەواڵ

 

٢٠ی نیسان هاوکات لەگەڵ هێرشکردنە سەر شەنگال لەلایەن سوپای عیراقەوە، دوو ڕۆژنامەنووس بە ناوەکانی مارلین فۆرستەری ئەڵمانی و ماتیچ کاڤیچی سلۆڤیی لەلایەن سوپای عێراقەوە لە خاڵێکی پشکنین دەستگیرکراون و دەوترێت کە گواستراونەتەوە بۆ زیندانی هەواڵگری لە بەغدا، ئەمەش لەکاتێکدا بووە ئەو دوو ڕۆژنامەنووسە بۆ چاودێریکردنی دۆخی شەنگال لە هەرێمەکە بوون و لە ئاهەنگی سەری ساڵ، چوارشەممە سور گەڕاونەتەوە.

 

ئەو دوو ڕۆژنامەنووسە ماوەی ١٠ ڕۆژە زیندانیکراون، بەپێی زانیارییەکان مارلین فۆرستەر ماوەی ٣ ڕۆژە دەستی بە مانگرتن لە خواردن کردووە، هەروەها لیدیا فۆرستەر، دایکی مارلین، لە لێدوانێکیدا بۆ چرا تیڤی ئاماژەی بەوەداوە کە لە باڵیۆزخانەی ئەڵمانیا لە عێراق و لە ڕێگەی وەزارەتی دەرەوە وەڵامی دراوەتەوە کە مارلینی کچی لە زیندانی هەواڵگرییە لە بەغدا.

 

لیدیا فۆرستەر ڕاشیگەیاند، بەپێی زانیارییەکانی وەزارەتەکە مارلین ماوەی ٣ ڕۆژە بەهۆی فشارەکانی حکومەتی عێراقەوە مانی لە خواردن گرتووە، هەردوو ڕۆژنامەنووسەکەش لە زیندانی تاکەکەسیدان.