هەڵەبجە

 

پێشنیوەڕۆی ئەمڕۆ لە شارەدێی خورماڵ سەر بە پارێزگای هەڵەبجە، یەکەمین بازاڕچەی بە بازاڕکردنی بەرهەمی خۆماڵی و فێستیڤاڵی گوێز بەڕێوەچوو، تیایدا بەرهەمی خۆماڵی گوێز، ڕۆنی خۆماڵی، دۆشاوی توو، هەنار و ئاوی دەنار و سرکەی تایدا نمایش کرا.

 

لە فێستیڤاڵەکەدا چەندین ژن بە فرۆشتنی بەروبومی خۆماڵی بەشدار بوون، لەیلا محەمەد، لە هەورامانەوە بەشداربوویەکی فێستیڤاڵەکەیە و وتی: لە فێستیڤاڵەکاندا بەشداری دەکەین و بەرهەمی گوێز و هەنگوین دادەنێین، گوێزی هەورامان بەوە جیا دەکرێتەوە کە تام و بۆنی جیاواز و خۆشە و هاوڵاتیان زیاتر خواستیان لەسەر بەروبومی خۆماڵییە.

 

شەرافەت رۆستەم بەشداری فێستیڤاڵەکەی کردەوە و وتی: بە مەبەستی مانەوەی کولتووری کوردی و کوردەواری وەک هەورامی زمان هاتووم و بە هەبوونی ئەم چالاکییانە بەروبومەکانمان خواست لەسەریان زیاد دەکات.

 

ڕۆزی ئاوات بەشداربوویەکی دیکەیە و وتی: هەرچەندە یەکەم فێستیڤاڵە کە لە خورماڵدا بەڕێوەدەچێت، بەڵام ئەزموونێکی باشە و دەتوانین کارەکانمان نمایش بکەین و لەوە باشترە لە ماڵەکانمان بمێنینەوە.

 

بڕیارە فێستیڤاڵی گوێز ماوەی سێ ڕۆژ بەردەوام بێت و ئامانجیانە بتوانن فێستیڤاڵەکە بگوازنەوە بۆ شارەکانی دیکەی هەرێمی کوردستان.