ناوەندی هەواڵ

 

ئیدارەى گەرمیان لە ڕاگەیەندراوێکدا بڵاویکردەوە، لەبارەى پرسی بەهاناوەچوونی لێقەوماوانی بومەلەرزە کارەساتبارەکەی باکوور و ڕۆژئاواى کوردستان ئەمڕۆ کەمپەینى کۆکردنەوەى هاوکارى ڕادەگەیەنین، داواش لە لایەنە سیاسیەکان، رێکخراوە خێرخوازیی و کۆمەکبەخش و مەدەنیەکان و چالاکان و خێرخوازان و کەناڵەکانی ڕاگەیاندن دەکەن کە وەک ئەرکێکی نیشتمانی تێیدا بەشداربن.

 

هەر ئەمڕۆ لە ئیدارەى ڕاپەڕین کەمپەینى کۆکردنەوەى هاوکارى بۆ لێقەوماوانی بومەلەرزەکەى باکوور و ڕۆژئاوای کوردستان ڕاگەیەندرا و هاوکارییەکان لەبەردەم سەرۆکایەتى زانکۆى ڕاپەڕین- کەمپى ڕانیە کۆدەکرێتەوە.

 

هاوکات، قائیمقامیەتى سلێمانى بڵاویکردەوە، ئەمڕۆ لە سلێمانی کەمپینی کۆکردنەوەی هاوکاری بۆ لێقەوماوانی بومەلەرزەکەى باکووری کوردستان و ڕۆژئاوای کوردستان و ڕۆژهەڵاتی کوردستان ڕاگەیەندراوە و لە ئەمنە سوورەکەی شاری سلێمانی هاوکارییەکان کۆدەکرێتەوە.

 

جێگەى ئاماژەیە، بەرەبەیانی ڕۆژی دووشەممە، ٦ی شوبات بوومەلەرزەیەك بە گوڕی ٧.٨ پلە بە پێوەری ڕێختەر بەشێك لە ناوچەكانی باكووری كوردستان و توركیا، ڕۆژئاوای کوردستان و سوریای گرتەوە و دواتر چەندین بوومەلەرزەی تر ئەو ناوچانەی هەژاند.