ناوەندی هەواڵ

 

لە دوێنێوە پەتای سكچوون ڕشانەوە لەناو بەشێكی زۆری منداڵانی شارۆچکەی شارەزوور لە پارێزگای سلێمانی بڵاوبووەتەوە، تیمی تەندروستی و بەڕێوەبەرایەتی ئاو سەرقاڵی دۆزینەوەی سەرچاوەی كێشەكەن، تائێستا هۆكاری بڵاوبوونەوەی نەخۆشییەكەش نەزاندراوە.

 

ڕەمەزان عارف، بەڕێوەبەری فەرمانگەی ئاوی شارەزوور لە كۆنگرەیەكی ڕۆژنامەوانیدا وتی: لە دوێنێوە حاڵەتێكی نەخوازراو لە سنوورەكەماندا دروستبووە، لەگەڵ بەڕێوەبەرایەتی ئاوی سلێمانی و هۆبەی تەندروستی و نەخۆشخانەی شەهید ڕەوف بەگ لەسەر هێڵین بۆ ئەوەی هۆكاری نەخۆشییەكە بزانین، تیممان پێکهێناوە و چوینەتە پرۆژە ئاوی بێستانسوور، ڕێژەی كلۆرمان بەشێوەی ستاندارد بووە، پشكیننی كیمیایی و فیزییاشمان وەرگرتووە و ئاوەکە شیاوە بۆ خواردنەوە.

 

وتیشی: ناتوانین بڕیار بدەین هۆكاری نەخۆشییەكە چیە، تاوەكو پشكنینەكان دەرنەچێت.